Андижон вилояти Ички ишлар бошқармаси маҳалла билан ҳамкорликда ҳуқуқбузарлик ва жиноятчиликни олдини олиш борасида «янгича ишлаш» тизими фаолиятини йўлга қўйди. Бу ҳақда вилоят ИИБ ахборот хизмати маълум қилди.
Андижон вилояти ИИБ марказий аппарати ходимлари шаҳар ИИБ профилактика хизмати ходимларига яқиндан ёрдам бериш ва «янгича ишлаш» тизими фаолиятини ташкиллаштиришда кўмаклашиши мақсадида Андижон шаҳар ҳудудида жойлашган 83 та маҳалла фуқаролар йиғинига бириктирилди.
Шаҳар ИИБ профилактика инспекторлари маҳалла посбони, фуқаролар йиғинларининг фаоллари ва жамоатчилик вакиллари билан соат 20:00 дан кейин ҳар бир маҳаллага кириш жойларида, аҳоли кўп тўпланадиган ва савдо комплекслари атрофида янги йўналишда ташкил этилган «маҳалла пост»ларида хизмат олиб бормоқда.
Хизматга жалб қилинган ички ишлар органлари ва жамоатчилик вакиллари маҳалла фуқаролар йиғинига кириб келаётган ҳар бир фуқаро ва транспорт воситасини текшириб, текширув китобларга қайд қилиб бормоқда. Ўзини шубҳали тутган шахслар ва транспорт воситалари текширувдан ўтказиш учун яқин орадаги ички ишлар бўлимларига олиб борилмоқда. Бунда бошқарманинг Патруль-пост хизмати ва жамоат тартибини сақлаш бошқармасининг пиёда ва автопатруль йўналишида хизмат олиб бораётган ходимлари яқиндан ёрдам бериб келмоқда.
Янги йўналишда ташкил этилган хизмат вилоятнинг барча шаҳар ва туманларида ҳам йўлга қўйилмоқда. Бундан кўзланган мақсад эса тунги вақтда тинчлик ва осойишталикни таъминлаш, фуқароларни хавфсизлиги ва жамоат тартибини сақлашдан иборат.
Изоҳ (0)