Greenpeace фаоллари АҚШ президенти Дональд Трампнинг Париж битимини йиртаётган чақалоқ кўринишидаги етти метрли ҳайкалини G20 саммити бўлиб ўтаётган Гамбург шаҳрига ўрнатди. Greenpeace акцияси АҚШнинг иқлимни ҳимоя қилишга йўналтирилган битимдан чиқишига норозилик намойиши сифатида ўтказилмоқда. Бу ҳақда ташкилотнинг расмий сайтига жойлаштирилган пресс-релизда сўз боради, деб хабар берди «ТАСС».
Трамп кўринишидаги йиғлаётган чақалоқ ҳайкалига папье-машедан тайёрланган таглик кийгизиб қўйилган. У қўлида Париж битимининг йиртилган нусхасини ушлаб турибди. Ҳайкал Эльба дарёсидаги вақтинчалик кўприкка — G20 етакчилари учун концерт бўлиб ўтган филармония биносининг қарама-қаршисига ўрнатилди.
«G20 нинг бошқа етакчилари Трамп қачон катта бўлишини кута олмайди», — деди Greenpeace’нинг иқлим муаммолари бўйича эксперти Карстен Смид. У «йигирмалик» етакчиларини Париж битимини қайта кўриб чиқиш лозим эмас, деган фикрда қатъий туришларига чақирди.
АҚШ президенти Дональд Трамп 1 июнь куни Америка Иқлим бўйича Париж келишувидан чиқишини эълон қилганди.
Изоҳ (0)