АҚШ штатларининг қарийб ярми сайловлар ҳақидаги ахборотни мамлакат президенти Дональд Трамп томонидан ташкил этилган ва овоз бериш жараёнини ўрганувчи комиссияга тақдим этишни истамаяпти.
Сайловчиларнинг исм-шарифлари, туғилган санаси, партиявийлиги тўғрисидаги маълумотларни тақдим этиш талабини мавжуд 50 штатдан 24 таси рад этган, дея хабар бермоқда The Hill нашри.
Хусусан, президент талаби Кентукки штати томонидан ҳам рад этилган. Мазкур штат котиби Элисон Лундерган Граймснинг таъкидлашича, у штат аҳолиси ҳақидаги маълумотларни федерал ҳукуматга топшириш ниятида эмас.
Унинг фикрича, президент Трамп комиссияни «сайлов натижаларини сохталаштириш — одатий ҳол» деган хато ўй билан тузган.
Бунга жавобан Дональд Трамп ўзининг ғалабаси билан тугаган сўнгги президент сайловини сохталаштирилган, деб атади. «Штатлар нимани яширишга уринмоқда?», — деб ёзди АҚШ президенти Twitter’даги саҳифасида.
Аввалроқ АҚШ президенти сайловлардаги овозларни ҳисоблаш жараёни қанчалик хавфсиз эканини ўрганиш мақсадида махсус комиссия тузгани маълум бўлган эди. Комиссия иштирокидаги тингловлар июль ойига режалаштирилган.
Изоҳ (0)