Президент Шавкат Мирзиёев Тошкент шаҳрида пахта бўйича халқаро тадбирларни муносиб ўтказиш бўйича фармойиш қабул қилди

Ўзбекистон Республикаси Президенти Шавкат Мирзиёев «Пахта бўйича халқаро консултатив қўмита 76-пленар йиғилиши ва XIII халқаро ўзбек пахта ва текстил ярмаркасини ўтказишни ташкиллаш чора-тадбирлари тўғрисида»ги фармойишни имзолади. Бу ҳақда Norma хабар бермоқда. 

Жорий йил 23— 27 октябрь кунлари Тошкент шаҳри Пахта бўйича халқаро консултатив қўмитанинг «Глобаллашув ва технологик тараққиёт даврида пахта» мавзуидаги 76-пленар йиғилишига мезбонлик қилади. 

Унинг очилиши 23–24 октябрь кунлари бўлиб ўтадиган XIII халқаро ўзбек пахта ва текстил ярмаркасига тўғри келади. 

Фармойишга биноан ярмарка савдоларига қўйиладиган пахта толаси ҳажмлари доимий фаолият кўрсатувчи ярмарка қўмитаси томонидан Ўзбекистон Иқтисодиёт вазирлиги билан ҳамкорликда белгиланади. 

Пахта бўйича халқаро консултатив қўмита, хорижий делегациялар ва «Ўзпахтасаноатекспорт» холдинг компанияси томонидан 76-пленар йиғилиши учун олиб келинадиган ахборот, тарқатма ва кўргазма материаллар божхона тўловларидан озод қилинди. 

«Ўзекспомарказ» майдонлари эса XIII халқаро ўзбек пахта ва текстил ярмаркаси иштирокчилари учун 50 фоизлик чегирма билан тақдим этилади.