Чиқиндиларни қайта ишлаш фабрикасининг ишчилари Американинг Нью-Жерси штатида истиқомат қилувчи Саманта ЛаРошелга адашиб ахлатга ташлаб юборилган оилавий ёдгорлигини тонналаб чиқинди ичидан топишда ёрдам кўрсатди, деб хабар беради «NJ.com».
Аёл беҳуш ҳолда шифохонага тушганида тақинчоғини йўқотиб қўйган. Уни ечинтирган тиббиёт ходимлари қимматбаҳо буюмни тасодифан ахлатга ташлаб юборган.
Ўзига келган ЛаРошел унинг тақинчоғи қаерга йўқолганини сўраб ҳеч кимдан била олмаган. Тақинчоқдан бири унинг бобосига тегишли бўлган. Бошқа тақинчоқ эса тилладан ишланган бўлиб, унга марҳум онасининг бармоқ изи туширилган. Иккала тақинчоқ ҳам битта занжирга осиғлиқ бўлган. «Ушбу буюм мен учун дунёдаги энг аҳамиятли», — дейди аёл.
Полиция ЛаРошелга ёрдам беришга рози бўлган. Ходимлардан бири кузатув камералари ёзиб олган тўққиз соатли видеони ўрганиб чиқиб, қайси компания шифохонадан ахлатни олиб чиқиб кетганини аниқлаган.
Бу маълумот ЛаРошелни Оксфорддаги чиқиндиларни қайта ишлаш фабрикасига олиб келган. Унинг илтимосига кўра, ишчилар икки соат давомида турли воситалар ёрдамида шифохонадан чиққан чиқиндиларни титган. Натижада улардан бири аввалига ЛаРошелнинг футболкасини, кейинроқ эса ёдгорлик солинган идишни топишга муваффақ бўлган.
Эртаси кунига аёл унга ёрдам берган фабрика ишчиларига тушлик ҳамда торт олиб келди.
Изоҳ (0)