Шанхайда сохта кимошди савдолар орқали коллекционерларни 7 миллион долларга алдаган 53 нафар фирибгар қўлга олинди

Шанхай полицияси санъат асарларининг ноқонуний кимошди савдосини ташкиллаштиришда ҳамда камида тўққиз минг коллекционерни 46 миллион юанга (6,7 миллион доллар) алдаганликда гумонлаб 53 кишини қўлга олди. Бу ҳақда «Шанхай жибао»га таяниб, «ТАСС» хабар берди.

Фирибгарлар уч йил давомида санъат асарларининг кимошди савдосини ўтказиш хизматини таклиф қилиб, «Цзиньтан» компания белгиси остида фаолият юритган. Ташкилотчилар сохта бўлиб чиққан савдоларни ўтказиш учун мижозлардан 6 мингдан 40 минг юангача (882 доллардан 5,8 минг долларгача) пул олган.

Шунингдек, фирибгарлар санъат асарларининг рекламасини ҳеч қаердан рўйхатдан ўтмаган «Санъатдаги сармоя» журналида чоп этишни ҳам таклиф қилган. Полиция баёнотида айтилишича, савдода 250 юандан (36 доллар) пул олган сохта шахслар иштирок этган.

Коллекционерларни кимошди савдоларига санъат асарига шундоқ ҳам савдо вақтида ҳеч ким таклиф қилмайдиган юқори нарх ваъда қилиб жалб қилишган. Сўнгги икки йил давомида бу турдаги кимошди савдолардан бир нечтаси ташкиллаштирилган. Улар асосан шаҳарнинг қиммат меҳмонхоналарида бўлиб ўтган.