44 минг долларлик нефрит билагузукни синдириб қўйган турист ҳушидан кетиб қолди

Хитойлик турист аёл тасодифан қиммат нефрит тақинчоққа шикаст етказиб қўйгач, ҳушидан кетиб қолди, деб хабар берди «Жэньминь Жибао».

Ҳодиса 27 июнь куни Юньнань провинциясининг жанубидаги Жуйли шаҳрининг бозорида содир бўлган. Шахси айтилмаган аёл полга қиймати 300 минг юан (тахминан, 44 минг доллар) турадиган билагузукни тақиб кўраётганида тушириб юборган.

Бунинг оқибатида тақинчоқ икки қисмга бўлиниб кетган. Синган буюмнинг нархини эшитган хитойлик аёл ҳушидан кетиб қолган. Аёл билан бирга бўлган унинг оила аъзолари товон сифатида сотувчига 10 минг доллар таклиф қилган. Бироқ сотувчи ушбу маблағ зарарни қоплаш учун етарли бўлмагани сабаб бош тортган.

Натижада туристнинг оиласи эксперт заргарга мурожаат қилди. У тақинчоқни 26,5 минг долларга баҳолаган. Сотувчи товон пули сифатида шунча маблағни олишга рози бўлган.

Хитойда нефритни жуда қадрлашади. Ушбу мамлакатда нефрит ўз эгасига соғлиқ ва узоқ умр олиб келади дея ҳисоблашади.