Бразилия президенти Мишель Темер Гамбургда 7—8 июль кунлари бўлиб ўтадиган G20 саммитига ташрифини бекор қилди. Бу ҳақда давлат раҳбарининг матбуот хизмати маълум қилди, дея хабар беради «ТАСС».
«Президент G20 саммитига бормаслик ҳақида қарор қабул қилди», — дейилади матбуот хизмати хабарида.
Ташриф бекор қилиниши сабаблари расман маълум қилинмади. Бироқ UOL интернет-портали Темер парламент унга коррупцияда айблов эълон қилиш масаласини ҳал этадиган пайтда мамлакатни тарк этмасликка қарор қилганини билдирди.
Эслатиб ўтамиз, Бразилия бош прокурори Родриго Жано Мишель Темерга нисбатан коррупцияда айбловни илгари сурди ва бунга тааллуқли ҳужжатларни Бразилия Олий суди ҳамда Конгресс қуйи палатасига юборди.