Япониянинг эконом-классдаги Vanila Air авиакомпанияси жисмоний имконияти чекланган йўловчини самолёт бортига судралиб чиқишга мажбур қилди, деб ёзади «РИА Новости» Kyodo агентлигига таяниб.
Ногиронлар аравачасида ҳаракатланадиган эркак Япония жанубидаги Амами шаҳригача чипта сотиб олган. Рўйхатга олиш пештахтасида рейсда мустақил тарзда ҳаракатлана олмайдиган кишиларга хизмат кўрсатиш учун шароитлар йўқлигидан хабар топган. Унга: «Юра олмайдиган одам самолёт бортига ҳам ўтира олмайди», — деб айтишган.
Уни қўлларида кўтариб олган дўсти ёрдамида эркак самолёт бортига ўтиришга муваффақ бўлган. Ортга қайтишда эса экипаж унга бортга бегона одамнинг ёрдами билан чиқа олмаслигини ва буни мустақил тарзда амалга ошириши кераклигини айтган. Эркак фалаж оёқлари билан трапнинг 17 та зинасидан судралиб чиққан.
Таъкидланишича, воқеа ОАВлар эътиборига тушгач, авиакомпания йўловчидан узр сўраган.
Изоҳ (0)