Америкалик учувчилар шу ой мобайнидаги учта турли операцияда Сурия қирувчи самолётларини уриб туширишга рухсат беришни сўради. Улар буни ўзини ҳимоя қилиш зарурати билан изоҳлади. Бу ҳақда АҚШ Ҳарбий-ҳаво кучлари генерали Чарлз Коркоран маълум қилди, дея хабар беради «Газета.ru».
Генералга кўра, учта ҳолатда ҳам «ҳимоясиз авиация» — ёқилғи тўлдирувчи самолётлар Сурия ёки Россия қирувчиларидан нима кутиш мумкинлиги мавҳум бўлгани учун ҳаво ҳудудини тарк этган.
«Биз кескинликни юмшатишга ҳаракат қиляпмиз. Бу ерда ИШИДга қарши курашиш учун бўлиб турибмиз, бироқ ҳарбийларимизни Сурия тузуми номидан ҳаракат қилаётган шахслардан ҳимоя қилишимиз ҳам зарур. Агар АҚШ ҳарбий кучларига қарата ўқ узилгудек бўлса, улар албатта ўзини мудофаа қилади.
Умуман олганда, Ироқдан фарқли равишда, Сурияда расмийлар томонидан ижозат олинмаслиги туфайли парвозларни амалга ошириш анчайин мушкул масала», — таъкидлади Чарлз Коркоран.
Эслатиб ўтамиз, АҚШ бошчилигидаги коалиция авиацияси 18 июнь куни Раққа шаҳрида Суриянинг Су-22 қирувчи самолётини уриб туширганди.
Изоҳ (0)