Россия суд ижрочилари федерал хизматининг Москва шаҳар бошқармаси «Система» акциядорлик-молия корпорациясига тегишли қатор активлар акциялар пакетини хатлади. Бу ҳақда «Коммерсантъ» хабар бермоқда.
Жумладан, «Медси» клиникалар тармоғининг 100, БЭСКнинг 90,47, МТСнинг 31,76 фоиз акциялари хатланди. Мазкур чора «Роснефть» ва «Башнефть»нинг корпорацияга нисбатан 170,6 миллиард рубль миқдоридаги даъвосини қондириш доирасида Бошқирдистон арбитраж суди қарорига асосан қўлланди. Шунингдек, суд «Система» АМК ва «Система-инвест»нинг хатланган акциялардан даромад олиш ҳуқуқини ҳам чеклади.
«Даъвонинг ўзи каби ушбу чоралар ҳам суд жараёнида масалага ойдинлик киритиш истагини билдирмайди ва компанияга мисли кўрилмаган босим ўтказишга қаратилган навбатдаги уринишни англатади. Акциядорларимиз ‘Роснефть’ даъвоси туфайли шундоқ ҳам акциялар қиймати пастлаши сабабли 150 миллиард рубль зарар кўрди. Даъвони таъминлашга қаратилган чоралар оқибатида бу зарар салмоқли даражада ортишини кутиш мумкин. Биз даъвогарларнинг талабини асоссиз ва ноқонуний деб ҳисоблаймиз ва суд ҳамда суд ижрочилари хизмати қарорларига шикоят келтирамиз», — деди «Система» АМК вакили Сергей Копитов.
Маълумот учун, «Роснефть» вакиллари «Башнефть» компанияси 2013—2014 йилларда мулк тизимини қайта кўриб чиқиш жараёнида 170,6 миллиард рубль йўқотган, деб ҳисоблайди.
Мазкур компания акцияларининг назорат пакети 2014 йилгача «Система» АМК тасарруфида бўлган ва кейинчалик давлат ихтиёрига ўтганди. 2016 йил октябрида эса уни «Роснефть» сотиб олди.
Изоҳ (0)