1975 йилнинг ноябрь ойида Physical Review Letters журналида тадқиқотчи Хизерингтон ҳамда Уилларднинг «Two-, Three-, and Four-Atom Exchange Effects in bcc3 He» номли мақоласи чоп этилди, бироқ мақола муаллифларидан бири мушук эди, деб хабар берди Forum Daily.
Мақола муаллифлари Мичиган университетидаги физика факультетининг илмий ходимлари бўлишган. Орадан беш йил ўтиб муаллифлардан бири Уиллард Франциянинг La Recherche илмий журналида яна бир мақола чоп этган.
Кейинроқ аниқланишича, Хизерингтон ростдан ҳам Мичиган университетининг профессори ва илмий мақоллалар муаллифи бўлган. Бироқ Уиллард — бу Хизерингтоннинг Честер лақабли мушугининг таҳаллуси.
Аниқланишича, Physical Review Letters журналининг талабига кўра чоп этиладиган мақоланинг иккита муаллифи бўлиши керак. Профессорга бу ҳақда таҳририятдан олдин мақолани ўқиб чиққан ҳамкасби айтган.
1975 йилда шахсий компьютерлар ва Word дастури бўлмагани, матндаги нотўғри сўзларни тезда алмаштириш имкони йўқлиги сабаб Хизерингтон тайёр мақолага ҳаммуаллиф — мушуги Честерни қўшиб қўйган. Шундан қилиб у бутун бошли матнни қайта ёзиб чиқмасдан, шунчаки титул вароғини ўзгартириб қўя қолган.
Таҳририятдан мақолага имзо қўйиш лозимлиги ҳақида хабар келганида, Хизерингтон ўз имзосини, мушук эса ўз панжа изларини қўйган.
Бироқ бу воқеа барибир фош бўлди, чунки профессорнинг ёнига ташриф буюрганлар доим Уиллардни сўраган.
Университет ҳазилни ижобий қабул қилган ва 1975 йилда физика факультетининг раҳбари Хизерингтонга хат ёзган. Унда Хизерингтондан Уиллардни ишга келишга, ҳеч бўлмаганда «машҳур профессор» сифатида ташриф буюришга кўндиришини сўраган.
Ҳазилни фақатгина Physical Review Letters муҳаррирлари тўғри тушунмаган.
Изоҳ (0)