«Ўзметкомбинат» машинасозлик саноати учун деталлар ишлаб чиқаради

Ўзбекистон Президенти Шавкат Мирзиёев «Машинасозлик саноати учун маҳкамловчи деталлар ишлаб чиқаришни ташкил этиш» инвестиция лойиҳасини амалга ошириш чоралари тўғрисидаги фармойишни имзолади. Бу ҳақда UzNews хабар бермоқда.

Ҳужжатга кўра, инвестиция лойиҳасининг умумий қиймати 31,57 миллион долларни ташкил этади. «Ўзбекистон металлургия комбинати» АЖнинг ўз маблағи (9,42 миллион доллар), Коммерсбанкнинг (Германия) 6,02 миллион доллар, Хитой давлат тараққиёт банкининг 12,58 миллион доллар, «Ипотека банк»нинг 3,55 миллион доллар миқдоридаги кредитлари инвестиция лойиҳаси молиялаштирилиши манбалари ҳисобланади.

Тендер савдолари натижаларига кўра «Ўзметкомбинат» АЖ ва INOXIHP Spa (Италия), Sytco A.G. (Швейцария) ва Berkshire Establishment LLP ( Буюк Британия) компаниялари ўртасида лойиҳани амалга ошириш учун жиҳозлар етказиб бериш бўйича шартномалар имзоланди.

Фамойишда «Машинасозлик саноати учун маҳкамловчи деталлар ишлаб чиқаришни ташкил этиш» инвестиция лойиҳасини белгиланган муддатларда бажариш учун тегишли ташкилотларга аниқ кўрсатмалар берилган.