Ёқилғи цистернасининг ёниб кетиши оқибатида Покистонда 141 киши қурбон бўлди
Покистоннинг Панжоб вилоятидаги Баҳавалпур шаҳрида ёқилғи ортилган цистернанинг ёниб кетиши оқибатида камида 141 киши ҳалок бўлган, 60 киши жароҳат олган. Бу ҳақда Geo TV телеканалига таяниб, «ТАСС» хабар бермоқда.
Аввалроқ 123 киши ҳалок бўлгани ва 15 киши жароҳатлангани ҳақида хабар берилган эди.
Баъзи нашрларнинг ёзишича, жабрланганлар сони 100 кишини ташкил қилган.
Телеканал маълумотларига кўра, маҳаллий аҳоли трассада ағдарилиб кетган цистернадан оқиб чиқаётган ёқилғини идишларга қуйиб олмоқчи бўлаётганда, бирдан ёнғин бошланган. Жароҳатланганларнинг танаси жиддий куйган, уларнинг кўпчилиги оғир аҳволда.
Гувоҳларнинг сўзларига кўра, ёқилғи оқаётган жойда бир неча киши сигарет чеккан ва бу ёнғинга сабаб бўлган бўлиши мумкин. Олов ўнлаб автомобиль ва мотоциклни йўқ қилган. Ҳозирги вақтда қутқарувчилар ёнғинни ўчиришга муваффақ бўлган.
