Тошкентнинг «Пахтакор» клуби кеча — 23 июнь куни янги бош мураббий сифатида грузиялик Шота Арвеладзени таништирди. Мутахассис билан шартнома 1,5 йилга мўлжалланган.
Менга билдирилган ишонч учун ташаккур. Шаънимга билдирилган ёқимли сўзлар учун ҳам катта раҳмат!Мураббий ўзига бўлган таклифлар бир неча экани ҳақида айтиб ўтганди. Хўш, у нега айнан «Пахтакор»ни танлади?Бу ерда эканимдан бахтлиман. «Пахтакор» қандай жамоа бўлганини барчамиз эслаймиз, биламиз ва доим ёдимизда сақлаймиз. Бугундан бошлаб клубнинг шонли тарихини қайтаришга, жамоа байроғини юқорироқ кўтаришга бор кучимизни сарфлаймиз.
Шота Арвеладзе, «Пахтакор» бош мураббийи
Клуб раҳбариятининг жиддий таклифи ва мени олиб келишга бел боғлагани бош омил бўлди. Иккинчи тарафдан, клубнинг келажакдаги режалари, мақсадлари ва ажойиб катта лойиҳа мени қизиқтириб қўйди. Шахсан бу лойиҳада иштирок этишга мотивация кучли бўлди. Биз «Пахтакор»ни нафақат Ўзбекистонда, балки Осиёда энг кучли жамоага айлантиришни мақсад қилганмиз. Сизларни ишонтириб айтаман, бунинг учун жуда катта ишлар амалга оширилади. Бундан хавотир олманг.Мен таклифни қабул қилиш борасида кўп ўйлаб ўтирмадим. Клуб истиқболи борлиги кўриниб турибди. Унинг бир қисми бўлишни чин юракдан истаганим учун қарор қабул қилишга 1—2 кун етарли бўлди.
Тахминан 1 ой илгари Тошкентда бўлгандим. Кетаётганимда бу ерга қайтиб келишимга ишонгандим. Шундан кейин жамоанинг бир қатор ўйинларини кузатишга эришдим. Имкон қадар уни ўрганишга ҳаракат қилдим.
Бизда ўзимиз ишлаб чиққан дастур мавжуд. Бу ҳақида эрта-индин барча бохабар бўлади. Бунда муҳими фақатгина совринли ўринларни эгаллаш эмас. «Пахтакор» учун чўққи ва мақсад ягона — биз доим биринчи бўлишни истаймиз. Дастурнинг асосий мезони шу.
«Пахтакор» энди ҳужумкор, тажовузкор ўйин услубини қўллайди. Биз биринчи кундан бошлаб футболчиларга буни тушунтиришга ҳаракат қиламиз.
Шуни айтиб ўтмоқчиманки, клуб президенти ундаги барча нарсани ўзгартирмоқчи. Режаларимдан академия билан танишиш ҳам ўрин олган. Бу борада алоҳида шуғулланамиз. «Пахтакор» академияси жаҳоннинг энг зўрларидан бири бўлиши учун интиламиз. У энг сўнгги технологиялар билан таъминланади. Ахир келажак ҳақида қайғуришимиз керак. Келажакда легионерларга таяниб қолмасдан, маҳаллий ёшларга катта эътибор қаратиш янги сиёсатдан ўрин олган.
Шота Арвеладзе, «Пахтакор» бош мураббийи
Ўз вақтида Европада ном қозонган собиқ футболчи Ўзбекистон футболи ҳақида нималарни билади?
Ўзбек футболи ҳақида кўп маълумотга эга эдим десам, алдаган бўламан. Аммо охирги ҳафталарда жуда кўп маълумот тўпладим, бу борада менга кўмаклашишди. Ўзбекистонда ёш ва иқтидорли футболчилар кўплигига гувоҳ бўлдим. Асосийси, футболчиларингиз тўп билан муомала қилишни билади. Техникаси яхши футболчилар кўп экан. Ўзбекистонда футболни севишади, муҳими шу.Черногория терма жамоаси аъзоси Марко Симичнинг Ўзбекистонга ташрифи ва «Пахтакор» билан 2,5 йиллик шартнома имзолагани энди барчага маълум. Ўтган мавсумни «Ростов» сафида ўтказган футболчи эндиликда тошкентликлар ҳимоя чизиғини кучайтиришга ҳаракат қилади.Бунгача клубда қандай вазият ҳукмрон бўлган билмадим-у, менинг ишимга ҳеч ким аралашмайди. Аксинча, кўмак керак бўлса, максимал даражада ёрдамлашишади. Клуб раҳбарияти менга ишонишини ва ўз ёрдамини аяшмаслигини биламан.
Шота Арвеладзе, «Пахтакор» бош мураббийи
Жамоанинг қайси чизиғида муаммо борлиги билан қизиқдим ва шунга қараб футболчи изладим. Дастлаб Марко Симич билан оғзаки келишувга эришдим. Кейин раҳбарият масалани ҳал этди. Кимни олиш ёки олмасликни барибир улар ҳал этади. Марко Симич жамоамизга келиб қўшилганидан хурсандмиз.Таништирув маросимида иштирок этган ҳимоячи Марко Симич қуйидагича фикр билдирди:Клуб президенти Бобур Шодиев супер клуб тузишга ваъда берган. Шунчаки кучли жамоа эмас, балки супер клуб! Бу бошқа-бошқа нарсалар. «Пахтакор» тез орада супер клубга айланади.
Шота Арвеладзе, «Пахтакор» бош мураббийи
Мен ҳам Шота Арвеладзе билдирган барча фикрларга қўшиламан. Дарҳақиқат, «Пахтакор» Ўзбекистоннинг бош жамоаси. Биз барчамиз биргаликда уни элит клублар қаторига қайтариш учун курашамиз.Марко Симич, «Пахтакор» аъзоси
Матбуот анжуманининг якунида «Пахтакор» клубининг янги президенти Бобур Шодиев берилган саволларга жавоб қайтарди.
Нега айнан Шота Арвеладзе «Пахтакор»да деган саволга жавоб бермоқчиман. Биз ўзбек футболига янгилик олиб киришни истадик. Нафақат жамоанинг тактик ёки ўйин ташкил қилиши тарафидан, умуман клуб стратегияси ва тизими Европа футболидан андоза олишини хоҳладик.Жамоага кимни жалб этиш, кимни ўйнатишни фақат ва фақат мураббий ҳал этади. Янги футболчилар ҳали бўлади. Кимлар келишини мураббий ва раҳбарият ўзаро келишган ҳолда аниқлайди. Бизда ҳозир бир қатор футболчилар исми ёзилган шорт-лист мавжуд. Унда легионерлар ҳам бор. Айнан қайси позицияга кимларни жалб этаётганимизни ҳозирча ошкор қилмаймиз. Яқин ҳафталар ичида янги футболчилар ҳақида бохабар бўласиз.
Бобур Шодиев, «Пахтакор» клуби президенти
Янги стадион ҳақида
Ҳозирда биз янги стадион қуриш лойиҳаси устида иш олиб бормоқдамиз. Ҳукумат ёрдамида биз «Пахтакор»да янги стадион барпо этамиз. Яқин 6 ой ичида янги стадион лойиҳаси тақдимотини ўтказамиз. Шунингдек, клубнинг Қибрайдаги қароргоҳини реконструкция қиламиз. Янги стадион «Пахтакор» ўйингоҳининг ўрнида қурилади.Жаноб президентнинг сўзларига кўра, раҳбарият Жасур Абдураимовни жамоада олиб қолишга ҳаракат қилади. Шота Арвеладзенинг ўзи ҳам Абдураимовнинг клубда қолишини истаган. Шу билан биргаликда Бобур Шодиев осон кечмаган ўтиш босқичидан «Пахтакор»ни олиб чиқиб кета олгани учун Жасур Абдураимовга миннатдорчилик билдирган.Клубда молиявий томондан ҳеч қандай муаммо йўқ. Бунга қадар бўлган барча қарзлар буткул узилди. Биз ўзимиз мақсад қилган чўққига чиқамиз ва албатта клубимиз энг юқори даражада бўлади. Бунга сизларни бемалол ишонтира оламан. Клубимизнинг бир қатор ҳомий ташкилотлари бор, уларнинг барчаси хусусий.
Бобур Шодиев, «Пахтакор» клуби президенти
Изоҳ (0)