“Paxtakor” shunchaki klub emas, super klubga aylanadi. Stadion esa qaytadan quriladi

Toshkentning “Paxtakor” klubi kecha — 23-iyun kuni yangi bosh murabbiy sifatida gruziyalik Shota Arveladzeni tanishtirdi. Mutaxassis bilan shartnoma 1,5 yilga mo‘ljallangan.

Menga bildirilgan ishonch uchun tashakkur. Sha’nimga bildirilgan yoqimli so‘zlar uchun ham katta rahmat!

Bu yerda ekanimdan baxtliman. “Paxtakor” qanday jamoa bo‘lganini barchamiz eslaymiz, bilamiz va doim yodimizda saqlaymiz. Bugundan boshlab klubning shonli tarixini qaytarishga, jamoa bayrog‘ini yuqoriroq ko‘tarishga bor kuchimizni sarflaymiz.

Shota Arveladze, “Paxtakor” bosh murabbiyi

Murabbiy o‘ziga bo‘lgan takliflar bir necha ekani haqida aytib o‘tgandi. Xo‘sh, u nega aynan “Paxtakor”ni tanladi?

Klub rahbariyatining jiddiy taklifi va meni olib kelishga bel bog‘lagani bosh omil bo‘ldi. Ikkinchi tarafdan, klubning kelajakdagi rejalari, maqsadlari va ajoyib katta loyiha meni qiziqtirib qo‘ydi. Shaxsan bu loyihada ishtirok etishga motivatsiya kuchli bo‘ldi. Biz “Paxtakor”ni nafaqat O‘zbekistonda, balki Osiyoda eng kuchli jamoaga aylantirishni maqsad qilganmiz. Sizlarni ishontirib aytaman, buning uchun juda katta ishlar amalga oshiriladi. Bundan xavotir olmang.

Men taklifni qabul qilish borasida ko‘p o‘ylab o‘tirmadim. Klub istiqboli borligi ko‘rinib turibdi. Uning bir qismi bo‘lishni chin yurakdan istaganim uchun qaror qabul qilishga 1—2 kun yetarli bo‘ldi.

Taxminan 1 oy ilgari Toshkentda bo‘lgandim. Ketayotganimda bu yerga qaytib kelishimga ishongandim. Shundan keyin jamoaning bir qator o‘yinlarini kuzatishga erishdim. Imkon qadar uni o‘rganishga harakat qildim.

Bizda o‘zimiz ishlab chiqqan dastur mavjud. Bu haqida erta-indin barcha boxabar bo‘ladi. Bunda muhimi faqatgina sovrinli o‘rinlarni egallash emas. “Paxtakor” uchun cho‘qqi va maqsad yagona — biz doim birinchi bo‘lishni istaymiz. Dasturning asosiy mezoni shu.

“Paxtakor” endi hujumkor, tajovuzkor o‘yin uslubini qo‘llaydi. Biz birinchi kundan boshlab futbolchilarga buni tushuntirishga harakat qilamiz.

Shuni aytib o‘tmoqchimanki, klub prezidenti undagi barcha narsani o‘zgartirmoqchi. Rejalarimdan akademiya bilan tanishish ham o‘rin olgan. Bu borada alohida shug‘ullanamiz. “Paxtakor” akademiyasi jahonning eng zo‘rlaridan biri bo‘lishi uchun intilamiz. U eng so‘nggi texnologiyalar bilan ta’minlanadi. Axir kelajak haqida qayg‘urishimiz kerak. Kelajakda legionerlarga tayanib qolmasdan, mahalliy yoshlarga katta e’tibor qaratish yangi siyosatdan o‘rin olgan.

Shota Arveladze, “Paxtakor” bosh murabbiyi

O‘z vaqtida Yevropada nom qozongan sobiq futbolchi O‘zbekiston futboli haqida nimalarni biladi?

O‘zbek futboli haqida ko‘p ma’lumotga ega edim desam, aldagan bo‘laman. Ammo oxirgi haftalarda juda ko‘p ma’lumot to‘pladim, bu borada menga ko‘maklashishdi. O‘zbekistonda yosh va iqtidorli futbolchilar ko‘pligiga guvoh bo‘ldim. Asosiysi, futbolchilaringiz to‘p bilan muomala qilishni biladi. Texnikasi yaxshi futbolchilar ko‘p ekan. O‘zbekistonda futbolni sevishadi, muhimi shu.

Bungacha klubda qanday vaziyat hukmron bo‘lgan bilmadim-u, mening ishimga hech kim aralashmaydi. Aksincha, ko‘mak kerak bo‘lsa, maksimal darajada yordamlashishadi. Klub rahbariyati menga ishonishini va o‘z yordamini ayashmasligini bilaman.

Shota Arveladze, “Paxtakor” bosh murabbiyi

Chernogoriya terma jamoasi a’zosi Marko Simichning O‘zbekistonga tashrifi va “Paxtakor” bilan 2,5 yillik shartnoma imzolagani endi barchaga ma’lum. O‘tgan mavsumni “Rostov” safida o‘tkazgan futbolchi endilikda toshkentliklar himoya chizig‘ini kuchaytirishga harakat qiladi.

Jamoaning qaysi chizig‘ida muammo borligi bilan qiziqdim va shunga qarab futbolchi izladim. Dastlab Marko Simich bilan og‘zaki kelishuvga erishdim. Keyin rahbariyat masalani hal etdi. Kimni olish yoki olmaslikni baribir ular hal etadi. Marko Simich jamoamizga kelib qo‘shilganidan xursandmiz.

Klub prezidenti Bobur Shodiyev super klub tuzishga va’da bergan. Shunchaki kuchli jamoa emas, balki super klub! Bu boshqa-boshqa narsalar. “Paxtakor” tez orada super klubga aylanadi.

Shota Arveladze, “Paxtakor” bosh murabbiyi

Tanishtiruv marosimida ishtirok etgan himoyachi Marko Simich quyidagicha fikr bildirdi:

Men ham Shota Arveladze bildirgan barcha fikrlarga qo‘shilaman. Darhaqiqat, “Paxtakor” O‘zbekistonning bosh jamoasi. Biz barchamiz birgalikda uni elit klublar qatoriga qaytarish uchun kurashamiz.

Marko Simich, “Paxtakor” a’zosi

Matbuot anjumanining yakunida “Paxtakor” klubining yangi prezidenti Bobur Shodiyev berilgan savollarga javob qaytardi.

Nega aynan Shota Arveladze “Paxtakor”da degan savolga javob bermoqchiman. Biz o‘zbek futboliga yangilik olib kirishni istadik. Nafaqat jamoaning taktik yoki o‘yin tashkil qilishi tarafidan, umuman klub strategiyasi va tizimi Yevropa futbolidan andoza olishini xohladik.

Jamoaga kimni jalb etish, kimni o‘ynatishni faqat va faqat murabbiy hal etadi. Yangi futbolchilar hali bo‘ladi. Kimlar kelishini murabbiy va rahbariyat o‘zaro kelishgan holda aniqlaydi. Bizda hozir bir qator futbolchilar ismi yozilgan short-list mavjud. Unda legionerlar ham bor. Aynan qaysi pozitsiyaga kimlarni jalb etayotganimizni hozircha oshkor qilmaymiz. Yaqin haftalar ichida yangi futbolchilar haqida boxabar bo‘lasiz.

Bobur Shodiyev, “Paxtakor” klubi prezidenti

Yangi stadion haqida

Hozirda biz yangi stadion qurish loyihasi ustida ish olib bormoqdamiz. Hukumat yordamida biz “Paxtakor”da yangi stadion barpo etamiz. Yaqin 6 oy ichida yangi stadion loyihasi taqdimotini o‘tkazamiz. Shuningdek, klubning Qibraydagi qarorgohini rekonstruksiya qilamiz. Yangi stadion “Paxtakor” o‘yingohining o‘rnida quriladi.

Klubda moliyaviy tomondan hech qanday muammo yo‘q. Bunga qadar bo‘lgan barcha qarzlar butkul uzildi. Biz o‘zimiz maqsad qilgan cho‘qqiga chiqamiz va albatta klubimiz eng yuqori darajada bo‘ladi. Bunga sizlarni bemalol ishontira olaman. Klubimizning bir qator homiy tashkilotlari bor, ularning barchasi xususiy.

Bobur Shodiyev, “Paxtakor” klubi prezidenti

Janob prezidentning so‘zlariga ko‘ra, rahbariyat Jasur Abduraimovni jamoada olib qolishga harakat qiladi. Shota Arveladzening o‘zi ham Abduraimovning klubda qolishini istagan. Shu bilan birgalikda Bobur Shodiyev oson kechmagan o‘tish bosqichidan “Paxtakor”ni olib chiqib keta olgani uchun Jasur Abduraimovga minnatdorchilik bildirgan.