Британиялик таниқли астрофизик Стивен Хокинг инсоният яқин 30—50 йилда Марс ва Ойга кўчиб бориши кераклигини айтди, деб ёзади «РИА Новости».
Норвегиядаги Starmus IV халқаро илм-фан ва санъат фестивалида нутқ сўзлаётиб, Хокинг инсониятнинг астероид қулаши, иқлим билан боғлиқ фалокатлар ёки аҳолининг кўпайиб кетишидан ҳалок бўлиши фақат вақтга боғлиқ масала эканлигини таъкидлади, шу туфайли у Ерни иложи борича тезроқ тарк этишга чақирди.
«Одамлар Ерни тарк этиши зарурлигига ишончим комил. Сайёрамизда биз учун жой тобора камайиб бормоқда, бизнинг жисмоний манбаларимиз эса жуда тез сарф бўлмоқда», — дея қўшиб қўйди у.
Хокинг яқин 30 йил ичида Ойда базага асос солиш керак, деб ҳисоблайди. Сўнг, астрофизик фикрича, одамлар Марсга кўчиб ўтиши керак. Бунинг учун у 50 йил вақт ажратди. Шу билан бирга, британиялик мутахассис одамлар бошқа сайёраларга ўсимликлар, ҳайвонлар, қўзиқоринлар ва ҳашаротларни олиб кетиши кераклигини қайд этди.
Аммо Хокинг фақат Қуёш тизими билан чекланиб қолмасдан, унинг ташқарисига чиқишни ва бизга энг яқин бўлган Альфа Центавра юлдуз тизимига етиб боришни таклиф қилмоқда, у ерда олимлар тахмин қилишича, ҳаёт учун яроқли бўлган Proxima b сайёраси мавжуд.
Изоҳ (0)