Britaniyalik taniqli astrofizik Stiven Xoking insoniyat yaqin 30—50 yilda Mars va Oyga ko‘chib borishi kerakligini aytdi, deb yozadi “RIA Novosti”.
Norvegiyadagi Starmus IV xalqaro ilm-fan va san’at festivalida nutq so‘zlayotib, Xoking insoniyatning asteroid qulashi, iqlim bilan bog‘liq falokatlar yoki aholining ko‘payib ketishidan halok bo‘lishi faqat vaqtga bog‘liq masala ekanligini ta’kidladi, shu tufayli u Yerni iloji boricha tezroq tark etishga chaqirdi.
“Odamlar Yerni tark etishi zarurligiga ishonchim komil. Sayyoramizda biz uchun joy tobora kamayib bormoqda, bizning jismoniy manbalarimiz esa juda tez sarf bo‘lmoqda”, — deya qo‘shib qo‘ydi u.
Xoking yaqin 30 yil ichida Oyda bazaga asos solish kerak, deb hisoblaydi. So‘ng, astrofizik fikricha, odamlar Marsga ko‘chib o‘tishi kerak. Buning uchun u 50 yil vaqt ajratdi. Shu bilan birga, britaniyalik mutaxassis odamlar boshqa sayyoralarga o‘simliklar, hayvonlar, qo‘ziqorinlar va hasharotlarni olib ketishi kerakligini qayd etdi.
Ammo Xoking faqat Quyosh tizimi bilan cheklanib qolmasdan, uning tashqarisiga chiqishni va bizga eng yaqin bo‘lgan Alfa Sentavra yulduz tizimiga yetib borishni taklif qilmoqda, u yerda olimlar taxmin qilishicha, hayot uchun yaroqli bo‘lgan Proxima b sayyorasi mavjud.
Izoh (0)