Тошкентнинг «Пахтакор» клуби эртага — 23 июнь куни бош мураббий Шота Арвеладзени жамоатчиликка расман таништиради. Грузия миллий терма жамоаси сафида энг кўп гол урган собиқ футболчи иккинчи даврадан эътиборан Тошкент грандини бошқаради.
Клуб бош директори Дмитрий Адисманнинг «Дарё»га маълум қилишича, таништирув маросимида «Пахтакор» клубининг янги раҳбарияти ҳам иштирок этади.
Ўз олдига юқори мақсадларни қўяётган «Пахтакор» Россия Премьер-лигасининг «Ростов» клубидан черногориялик Марко Симични ҳам олиб келган. Анжуманда футболчи билан шартнома қанчага тузилгани маълум қилинади.
Симич «Ростов»га қадар Беларусь, Болгария, Сербия, Венгрия клубларида, шунингдек, Туркиянинг «Кейсериспор», Исроилнинг «Хапоэл Т-А» клубларида тўп сурган. Черногория миллий термасига 2013 йилда жалб қилинган ҳимоячи ҳозирга қадар 21 та учрашувда майдонга тушган. Хусусан, у Эрон миллий терма жамоасига қарши ўртоқлик ўйинида ҳам ҳаракат қилган бўлиб, форслар Черногорияни айнан Ўзбекистон билан ўйин олдидан спаринг рақиб сифатида танлаб олганди.
Бош мурабби Арвеладзе эса Грузия терма жамоаси учун энг кўп гол урган футболчи ҳисобланади — 60 та ўйинда 26 та гол.
У футболчилик вақтида Туркиянинг «Трабзонспор», Голландиянинг «Аякс» ва «АЗ Алкмаар», «Шотландиянинг «Рейнжерс», Испаниянинг «Леванте» каби клубларида тўп сурган. Мураббий сифатида Туркиянинг «Кейсириспор» (2010—2012), «Қосимпошша» (2012—2015), «Трабзонспор» (2015) ва Исроилнинг «Маккаби» (2016—2017) клубларида ишлаган.
Арвеладзе мутахассис сифатида катта ютуқларга эришмаган. Бу борадаги фаолиятини у «АЗ Алкмаар» клубида Луи Ван Галга ёрдам бериш билан бошлаган.
Футболчи сифатида эса «Аякс» билан Голландия чемпионлиги ва кубоги, «Рейнжерс» билан Шотландия чемпионлиги ва кубогини қўлга киритган. 1994, 1998, 2007 йилги мавсумларда Грузиянинг энг яхши футболчиси сифатида тан олинган. 1995/96 йилги мавсум Туркия чемпионатининг энг яхши тўпурари бўлган.
Изоҳ (0)