«Жиззах ҳақиқати» газетасининг махсус мухбири Алижон Абдусатторов тўловни ошиғи билан тўлаб қўйганига қарамай, газдан қарзи бор дея судга чақирилгани ва унга ноҳақ муносабатда бўлишганида ҳақида мақола тайёрлади.
«Кутилмаганда суддан чақирув қоғози олдим. Аммо нима учундир чақирув қоғозида суд номи ва менга қанча жарима белгиланганлиги ҳамда сана кўрсатилиши керак бўлган жой очиқ қолдирилган эди... Чақирув қоғозидаги ўз ихтиёрим билан суд ижрочиларининг Жиззах шаҳар бўлимига бормасам, бу ишга милиция киришиши ва мендан 1 миллион 497 минг 750 сўм ундирилиши тўғрисидаги жумлалар қоғоз қуйисида келтирилган Б.Т.Чўлибоевнинг телефон рақамига сим қоқишга ундади... Суд ижрочиси Бобур Чўлибоевдан вазиятнинг ечими хатлов, суд ва ижро харажатларини тўлаш эканлигини билиб олдим... Қисқаси, «Жиззахшаҳаргаз» 890 минг 550 сўм қарзи бор, дея мени судга берибди», — деб ёзади мухбир.
У қарзи йўқлиги тўғрисидаги маълумотномани олиб, суд ижрочиларининг Жиззах шаҳар бўлимига боргани, Бобур Чўлибоев йўқлиги сабабли, унинг ҳамхонаси Жаҳонгир Рамизовга учрашганини қайд этган.
«Жаҳонгир Рамизов ижро йиғими ва суд учун давлат божини тўлашим шартлигини айтди, мен эса қарзим бўлмаса нима учун тўлов қилишим кераклигини билдирдим. У қўполлик билан тўлов қилмасам, жаримага тортишини айтиб, ҳужжатларим устига «Тўловдан бош тортди» деб ёзиб қўйди. Унинг муомаласи устидан шикоят қилмоқчилигимни баён қилдим ва «Шикоят қилаверинг, мен бу ерда жамоатчилик асосида ишлайман, бироқ шундай бўлса-да, мазангизни қочириб қўйиш қўлимдан келади» деган жавобни эшитдим», — деб ёзади журналист.
Суд ижрочиларининг Жиззах шаҳар бўлими бошлиғи Олимжон Қиличбеков вазиятга шундай изоҳ берди: «Суд орқали маблағ ундиришга доир ишларнинг 60—70 фоизи «Жиззахшаҳаргаз» ҳиссасига тўғри келаяпти. Яна ҳам қизиғи, улар томонидан судга берилганларнинг 50 фоизи аслида қарздор бўлиб чиқмаяпти. Жамоамизда 12 ходим ишлайди, «Жиззахшаҳаргаз» томонидан ишнинг сунъий тарзда кўпайтирилаётганлиги бизни ҳам қийнаб юбораяпти. Ташкилотнинг одамларга моддий ва маънавий зарар етказаётгани ҳам бор гап. Аммо суд буйруқ чиқаргач, бажаришга мажбурмиз. Электр таъминоти корхонасида бу борада иш тартибга тушиб қолган, аммо газ идорасида ҳисоб-китоб йўқ. Ходимимиз Жаҳонгирга келадиган бўлсак, унинг учун узр сўрайман, ёш-да...»
«Менинг судга берилишим сабабчиси — ўша вақтда назоратчи бўлиб ишлаган, ҳозирда участка раҳбари Нормат Давроновдан судга берилганлигим боисини сўрадим. У «уйда бўлмаган бўлсангиз керак, ўша вақти ўша кўчани подряд судга бериб юборганмиз» деди», — дейилади мақолада.
Журналист «Жиззахшаҳаргаз» бошлиғининг ўгитига амал қилиб, «Марказгазтаъминот» унитар корхонаси вилоят газ таъминот бошқармаси бошлиғи Мамаражаб Акбутаевга сим қоққан, у киши ўша куни вақти йўқлигини айтган. Унга кутишини билдирган. Кейинги куни интервью олиши сабабини сўраган. Шундан кейин Мамаражаб Акбутаев телефонни кўтармай қўйган.
«Шундай қилиб қўл силташимга тўғри келди. Илтимос, иродасизликда айбламанг. Мен бу мақолани қисқа ёзишга ҳаракат қилганман. Қайси идорага неча марта борганимни, кимларнинг эшиги тагида сарғайганимни, бу жараёнда кимларнингдир ижирғаниши, пўписаси ва ҳасратини юрагимдан ўтказишга мажбур бўлганимни ёзмадим, ёзганимда мени тушунган бўлардингиз.
Яна шуни билдимки, қайси идорада бўлмайин ҳеч ким қарзим бўлмасада ноҳақдан судга тортилганимни эшитиб, ажабланмади. Бу мазкур вазиятга ҳамма кўникиб қолганидан бўлса керак. Мен оммавий ахборот воситаси ходими сифатида шунча ташвишларни бошдан ўтказдим, оддий одамлар нима қилишаяпти экан?», — дея якунлайди ўз мақоласини журналист.
Изоҳ (0)