Ўзбекистон Савдо-саноат палатаси янги раҳбарияти сайланган навбатдан ташқари қурултойда иштирок этган бош вазир Абдулла Арипов мамлакатнинг турли минтақаларидан келган тадбиркорлар муаммолари билан танишди. Бу ҳақда «Газета.uz» хабар бермоқда.
Парфюмерия маҳсулоти ишлаб чиқарадиган Сирғали туманилик тадбиркор импорт қилинадиган хом ашёни расмийлаштириш жараёнидан нолиб, бу ўз навбатида маҳсулот экспортига таъсир қилаётганини билдирди. Бош вазир Давлат божхона қўмитасига импортчиларнинг рейтинг тизимини жорий этиш тавсия этилганини маълум қилди. Унда божхона операцияларини тезлаштирилган тартибда амалга ошириши мумкин бўлган тадбиркорлар инобатга олинади. «Маҳсулотни биринчи бор олиб келаётганлар ва бу иш билан 15 йилдан бери шуғулланаётганлар ўртасида фарқ бор»,— деди ҳукумат раҳбари.
Янгийўл туманидан келган фермер хўжалиги раҳбари бизнесини кенгайтириш — мол боқиш учун қўшимча ер олиш муаммосига тўхталди. Унинг айтишича, бу ҳақдаги илтимос билдирилган мактуб бир йилдан бери Вазирлар Маҳкамасида турибди.
Абдулла Арипов бу муаммони шахсан ўзи эртагача ҳал этишга ваъда берди. Бунга жавобан янграган қарсакларга жавобан бош вазир ҳали бунга эрта эканлиги, баъзан ҳатто ҳукумат қарорлари чиққанидан кейин ҳам айрим раҳбарлар унинг ижросини чўзиб юришини таъкидлади.
Нарпай туманидаги корхона эгаси Туркиянинг давлат «Зироат банки» кредит беришга тайёрлиги ва тадбиркорнинг кафиллик таъминоти мавжудлигига қарамай, Миллий банк кафолат бермаётганлигидан шикоят қилди. Абдулла Арипов Миллий банк вакилига масалани ҳал этишни топширди.
Бекобод туманилик тадбиркор аёл тикувчилик йўналишида иш бошлаш ва 100 миллион сўм кредит олиш учун етарлича гаров таъминоти эга эмаслигини билдирди. Унда қиймати 30 миллион сўм бўлган тикув машиналари борлигини билган бош вазир бу айнан 100 миллион сўмнинг 30 фоизи эканлиги ва лизинг учун етарли эканлигини айтиб, «Агробанк» вакилига тегишли кўрсатма берди.
Изоҳ (0)