Жаҳонгир Отажонов сўнгги 12 ой ичида тўрт марта, баҳор фаслида эса икки марта концерт берди. 24—25 май кунлари «Туркистон» санъат саройида бўлиб ўтган «Синфдош қиз» номли концерт ҳақида журналист Феруз Муҳаммад ўз фикрларини ўртоқлашди.
Ўринсиз хавотир
«Туркистон»даги концертдан бироз аввал Жаҳонгир Отажонов Москвадаги «Космос» меҳмонхонасида ва Санкт-Петербургдаги «Конгресс Ҳолл» концерт залида чиқиш қилган эди. Боз устига, концертдан бир кун аввал Бухоро вилоятига сафар қилиб, тўй хизматини ўтказиб қайтган.Хориждаги кетма-кет концертлар, тинимсиз парвозлар, олис ҳудуддаги тўй хизмати, йўл чарчоғи — буларнинг бари «Туркистон»да бўлажак дастурнинг кайфиятига салбий таъсир кўрсатиши мумкин деган хавотирларга сабаб бўлди. Бироқ бу хавотирлар ўринсиз бўлиб чиқди — бундан аввалги концертларда бўлгани каби, «Синфдош қиз» дастури ҳам юқори, такрорланмас бир муҳитда ўтди.
Мухлислар билан биргаликда, улар билан селфи тушиб, уларга тиз чўкиб куйлаган хонандани мухлислар ҳам муносиб қўллаб-қувватлади. Хонанда саҳнада қандай ҳаракат қилган бўлса, мухлислар залда ўша ҳаракатга муносиб жавоб қайтариб, холис ҳакам вазифасини бажарди.
Имидж
Бундан аввалги концерт дастурида Жаҳонгир Отажонов ўзгача кўринишда — плашч, шляпа ва кўзойнакда саҳнага чиққан эди, бу сафар эса хонанданинг имиджида жиддий ўзгаришларни сезмадик. Шунингдек, хонандани қувиб етолмайдиган қўриқчиларни ҳам кўрмадик. Тўғри-да, хонандани ўз мухлисидан қўриқлайдиган «security» кимга ҳам керак?!
Концертнинг биринчи кунида куйланган тароналарнинг аксари иккинчи куни ижро этилмаслиги, умуман режада бўлмаган қўшиқ куйланиши, қўшиқни хоҳлаган жойида тўхтатиб, бошқа таронага ўтиб кетиш каби ҳолатлар Жаҳонгир Отажонов концертлари учун одатий ҳол.
Аксарият бошқа хонандаларнинг концертларида дастурнинг кулминацион қўшиғи алоҳида таърифлар билан куйланиши одат тусига кирган. Жаҳонгир Отажонов эса ҳеч бир таронага ортиқча таъриф бермайди — нари борса ўша қўшиқнинг дастлабки тўрт мисрасини шеърий тарзда ўқиб бериши мумкин, холос.
Янги концерт жойи, концертдаги янгиликлар
Жаҳонгир Отажоновнинг сўнгги икки концерти «Туркистон» саройида ўтказилди ва, гап-сўзларга қараганда, хонанда энди фақат шу саройда концерт беради. Нега? «Гарчанд бу ерда ‘Истиқлол’дагига нисбатан кам пул топсак-да, залнинг энг охирида ўтирган мухлисимиз ҳам бизни эшитсин деган мақсад билан ‘Туркистон’да концерт беришга қарор қилдик. Бу санъат саройини яхши кўриб қолдим», — дейди Жаҳонгир Отажонов бу саволга жавобан.
Отажоновнинг шу вақтгача бўлган концертларида қўшимча воситалар, қизиқчилар, раққосалар гуруҳи бўлмаслиги одатий ҳол эди. Бироқ бу сафарги концертда маҳоратли раққоса Паризода ва унинг гуруҳи меҳмон бўлиб, саҳнада чиқиш қилди.
«Кимгадир фонограмма санъати устаси, кимгадир рақс санъати усталиги берилган. Албатта, бу гапим ҳазил, аммо чин. Паризодахонни қачон вақтлари бўлса, эшигимиз улар учун доим очиқ», — деди хонанда концерт вақтида. Раққосанинг ўзи эса концертни хавотир билан ўтказганини тан олди.
Жаҳонгир Отажоновнинг концерти тўлиқ импровизацияга асослангани учун навбатимиз қачон келар экан, деган хавотирда дастурни бошидан эшикнинг олдида кузатиб туришга мажбур бўлдим. Чунки бу хонанда хоҳлаган вақтда қўшиқлар кетма-кетлигини ўзгартириб, биринчи бўлиб куйланадиган қўшиқни дастурнинг сўнгги қўшиғи қилиб куйлаши ёки умуман тескарисини қилиши мумкин. Хонанда студияда қўшиқ ёзмаганлиги сабаб мен ҳам худди у каби импровизация қилдим — олдиндан тайёргарлик кўрмай рақсга тушдим.Паризода, раққосаРаққосанинг қўшимча қилишича, «дастурда кўпроқ қўшиққа рақс ташкиллаштириш ниятимиз бор эди, аммо вақт кам бўлганлиги сабаб улгурмадик». Маълумот учун — раққосалар концерт давомида фақат битта қўшиққа рақсга тушишди.
Қўшиқлар
Концерт «Мен сизга муштоқман» таронаси билан бошланди, «Истайсизми йўқми» номли қўшиғидан сўнг мухлислар билан саломлашди. Навоийнинг «Оразин ёпқоч, кўзумдан сочилур ҳар лаҳза ёш» сўзлари билан бошланувчи ғазалига ишланган қўшиқ концерт учун тайёрланган беш янги қўшиқдан бири бўлди — илк бора куйланган «Қаддим», «Саломат», «Дурра-дурра» ва «Намасан?» тароналари ҳам мухлислар томонидан давомли қарсаклар билан кутиб олинди.
Жаҳонгир Отажонов ҳар концертида қўшиқ куйлаб, зал бўйлаб саёҳатга чиқади. Бу сафар «Оқ булутлар» қўшиғи билан «кичик сайр» қилган хонанда ушбу композицияни мухлислар билан биргаликда куйлади. Қўшиқ бошланиши билан мухлислар телефон чироқлари ёрдамида залда митти юлдузчаларни ҳосил қилди.
«Гуноҳим», «Лозақизғалдоқ», «Аёл макри», «Ёлғончи ёр», «Жиннинг ихтироси», «Сен мени ўзингга ўргатиб қўйма», «Бевафо», «Мен сени ҳеч кимдан сўрамай севдим» каби қўшиқларни ҳам мухлислар жўр бўлиб куйлади.
«Ўзбекистон — сенинг ўғлингман» деб номланган тарона хонанда Жаҳонгир Отажоновнинг чиройли ўтган дастурнинг сўнгги қўшиғи бўлди. Қизиғи, бу дастурда номи концертга қўйилган «Синфдош қиз» қўшиғи куйланмади.
«Омадини берсин!»
Жаҳонгир Отажонов роса берилиб, бутун борлиғи билан қўшиқ куйлаётган эди. Шу вақт олд қаторда ўтирган таниқли актёр Муҳаммадисо Абдулхаиров ўрнидан туриб, хонандаги дастрўмол узатди. Қўшиқ шу билан тамом бўлди, томошабинлар эътибори маълум фурсат актёрга қаратилди. Жаҳонгир Отажонов савол берди: «Ўзингиз хоҳлаб келдингизми?».«Ҳа, ўзим, чин кўнгилдан хоҳлаб келдим концертга. Гарчи, Жаҳонгир мени таклиф қилмаган бўлса ҳам», — деб, актёр йиғилганларни кулдирди. Сўнг, хонандага бир иши учун ташаккур билдирди: «Ҳамма санъаткорлар концерт вақтида ‘балкон!’ деб бақиради, сиз шундай бақирмаганингиз учун алоҳида раҳмат!».
Санъатига ҳақиқатан ҳам беш кетамиз. Бошқа санъаткорлардан узр сўрайман, бундай йўналишда — Жаҳонгир Отажоновнинг йўналишида куйлайдиган хонандалар саноқли. Омадини берсин, юзи ёруғ бўлсин! Нафақат Ўзбекистонда, бутун дунёда альбомлари сотилиб, мухлислари бундан-да кўпайсин. Ўзи ҳозир ҳам бутун дунёда мухлислари бор, фақат улар ўзбек — Жаҳонгирнинг нафақат ўзбеклар, балки африкаликлар, хитойликлар, испанлар, японлар, мексикаликлар ҳам унга мухлислик қилишини тилаб қоламан.Муҳаммадисо Абдулхаиров, актёр
Изоҳ (0)