Ўзбекистон халқ артисти Юлдуз Усмонова ўн йиллик танаффусдан сўнг 9—23 апрель кунлари «Истиқлол» санъат саройида концерт берди.
Журналист Феруз Муҳаммаднинг маълум қилишича, дастурда асосан янги тароналар куйланди.
Ўзбекистонда хизмат кўрсатган маданият ходими Ўткир Сиддиқов олиб борган концертнинг Деярли ҳар бир таронасига рақслар тайёрланган бўлиб, улар пухта ижро қилинди.
«Баҳорим» деб номланган қўшиқ билан бошланган концерт давомида «Ялло демасман-эй», шоир Муҳаммад Юсуф қаламига мансуб «Қизғалдоғим» шеърига басталанган қўшиқ, шунингдек, дастурга номи берилган «Эй азиз инсон» номли тароналар куйланди.
Янги қўшиқлар қаторида «Жим, қулоқ сол дунё», «Намангандан кетар бўлсам, мени йўқлар кишим борму?» кабиларни ҳам алоҳида эътироф этса арзийди. Бундан ташқари, Юлдуз Усмонова халқ орасида оммалашиб улгурган «Қироличаман», «Санамгина», «Настарин» каби қўшиқларини яна бир бор куйлади.
Юлдуз Усмонова концертга нима учун «Эй азиз инсон» деб ном берганига эса алоҳида тўхталди.
Ҳамма ҳам хато қилади, аммо тўғри хулосани чиқариш барчага ҳам насиб этавермайди. Мен ўзимнинг кичик бир оламимада шуни тушуниб етдим: Аллоҳ Ҳазрати инсонни яратдики, унга фариштани ҳам тиз чўктириб қўйди, лекин инсон инсондан ор қилади.Биз инсонни бешиклик вақтиданоқ эъзозлашни ўргана олмаяпмиз, оёқости қиламиз. Кимдир етим, кимдир бутун; кимдир оч, кимдир тўқ, лекин ким аслида ким ва нима бўлади — буни фақат Аллоҳ билади; сиз билан биз бировни чертаётганда ўша одам эртага ким бўлиб кетади — буни фақат Аллоҳ билади.
Аллоҳ эъзоз қилганни бандаси тушира олмайди. Аллоҳ Ҳазрати инсон қилиб яратгани рост бўлсин. Ҳаммамиз адашмасдан, бир-биримизни қийматимизни билиб яшашимиз керак.
Юлдуз Усмонова, Ўзбекистон халқ артисти
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)