Қорақалпоғистонда хизмат кўрсатган артист Женисбек Пиязов 12 май куни «Истиқлол» санъат саройида жонли ижрода бир кунлик концерт дастурини тақдим қилади. Эътиборга молик томони, «Per amore» деб номланган дастур опера йўналишида ташкил этилади.
Концерт арафасида журналист Феруз Муҳаммад опера куйчиси билан суҳбат уюштирди.
— «Истиқлол»да шу вақтгача жонли ижрода яккахон опера концерти ҳеч қачон қўйилмаган бўлса керак, шундай эмасми?— Айтишларича, шу вақтгача ҳали ҳеч бир опера хонандаси «Истиқлол»да яккахон концерт дастурини тақдим этмаган экан. Иккинчи тарихий ҳодиса — Қорақалпоғистондан чиққан хонанда илк бор «Истиқлол» саройида яккахон концерт беришидир.
— Жонли ижрода концерт беришни ният қилган аксарият хонандалар концертга 2—2,5 ой қолганида созандалар билан биргаликда зўр бериб тайёргарлик кўради. Сиз тайёргарликни қачон бошладингиз?— 2013 йилда консерваториянинг катта залида концерт берган эдим. Концерт фаолиятимни кичик заллардан бошлаганман. Бундай заллардаги концертларда қайси қўшиқ мухлисларга манзур бўлиб, қай бири маъқул келмаслигини билиб, ўзим учун хулоса қилиб борардим. «Истиқлол»даги бўлажак концертга уч йилдан ортиқ вақт мобайнида тайёргарлик кўрдим, десам ҳам бўлади.
— Оркестр билан доимий тайёргралик қанча вақт бўлди?— Оркестрда 80 нафар, хорда 40 нафар ижрочи бўлади. Жами 120 нафар одам билан жаҳон кллассик қўшиқларидан куйлаш борасида анча аввалдан тайёргарлик бўлмоқда. Айнан шу дастур учун эса Миллий симфоник оркестр икки ойдан буён ноталарни кўриб чиқмоқда.
— Мухлисларни қандай ўзига хос чиқишлар, саҳна кўринишлари кутмоқда ёки дастур фақатгина сиз ва оркестрнинг ижод маҳсулидан иборат бўладими?— Дастурдаги кутилмаган чиқишлардан бири, менимча, эстрада хонандаларининг илк бор опера йўналишида қўшиқ айтиб чиқиши бўлади. Фаррух Зокиров, Озодбек Назарбеков, Насиба Абдуллаева, Муяссар Раззоқова сингари хонандалар дастурда меҳмон бўлиб, ария-опера айтишлари кутилмоқда. Устоз санъаткор Насиба Абдуллаева билан дуэт куйлаш ҳам режалаштирилган. Қўшиқларнинг барчаси 100 фоиз жонли ижрода бўлади. Насиб қилса, опера-шоу дастури уюштиришга ҳаракат қиламиз.
— Бу саволимдан ранжимайсиз деган умиддаман. Бу йўналишдаги дастурларга мухлисларнинг муносабати қандай? Концертга тўрт минг мухлис тўплай олишингизга ишонасизми?— Бундай концертга мухлислар тушармикан, деган хавотир ўзимизда ҳам бор эди. Аммо, мана, концертга ҳали ярим ойдан зиёд вақт бўлишига қарамай, чипталарнинг 60 фоизи сотилиб бўлди. Сотувда залнинг чекка жойлари учун чиқарилган чипталар қолган холос. Мўлжалимиз — апрель ойи охиригача барча чипталарни сотиб бўлиб, кассани ёпиш.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)