Бангладешнинг Нью-Йоркдаги бош консули ўринбосари Муҳаммад Шаҳидулисломга одамлар контрабандаси ва хизматкорига нисбатан жисмоний куч ишлатишда айблов эълон қилинди. Бу ҳақда «Вести.ru» хабар бермоқда.
Консул ўринбосари 12 июнь Нью-Йоркнинг Квинс тумани суди қаршисида ҳозир бўлди. Чекланган дипломатлик дахлсизлигига эга Муҳаммад Шаҳидулисломнинг паспорти олиб қўйилди.
Прокуратурага кўра, у АҚШ ҳудудига Бангладеш фуқароси Муҳаммад Аминни ноқонуний олиб келади. Шундан сўнг унинг паспортини олиб қўйиб, оиласи учун кунига 18 соат давомида бепул ишлашга мажбур қилади, вақти-вақти билан калтаклаб туради. Унга бўйсунмаган ва АҚШни тарк этишга уринган тақдирда эса Бангладешда қолган оила аъзоларини ўлдириш билан таҳдид этади.
Бангладеш элчихонаси ўз ходимига нисбатан айбловларни рад этди ва хизматкор у билан шартнома узайтирилмаганидан сўнг Муҳаммад Шаҳидулисломга туҳмат қилганини билдирди.
Суд томонидан ишнинг кўриб чиқилиши июнь охирида бошланади. Айбдор деб топилган тақдирда дипломат 15 йил муддатга қамалиши мумкин.
Изоҳ (0)