Лотин Америкасида энг кўп маош оладиган етакчи Гватемала президенти бўлди

Prensa Libre нашри версиясига кўра, Гватемала президенти Жимми Моралес Лотин Америкаси мамлакатлари раҳбарлари орасида энг кўп маош тўланадиган етакчига айланди, деб ёзади «РБК».

Республика ҳукумати сайтида эълон қилинган маълумотларга кўра, у ойига 19,3 минг доллар миқдорида маош олади. Бу мамлакатдаги энг кам иш ҳақининг 50 баробарига тенг. Энг кам иш ҳақи Гватемалада 393 долларни ташкил этади.

Моралесдан кейинги ўринни Чили раҳбари Мишель Бачелет эгаллади. У, маҳаллий ҳукумат сайтидаги ахборотга мувофиқ, ойига 14,9 минг доллар ишлаб топади.

Лотин Америкаси мамлакатлари президентлари маоши бўйича рейтингнинг юқори учлигига 13,8 минг долларлик ойлик билан Мексика раҳбари Энрике Пеня Ньето якун ясади.

Prensa Libre маълумотларига кўра, улардан кейин Лотин Америкасида ойига 10 минг доллардан ошиқ бўлган маошни фақат икки маҳаллий етакчи — Уругвай раҳбари Табаре Васкес (11,6 минг доллар) ва Колумбия президенти Хуан Мануэль Сантос (11,4 минг доллар) ишлаб топади.

Перу, Гондурас, Венесуэла, Боливия, Никарагуа давлат раҳбарлари эса ўз иши учун 5 минг доллардан кам ойлик олади. Лотин Америкаси мамлакатлари орасида Никарагуа президенти Даниэль Ортега энг кам — ойига бор-йўғи 3,2 минг доллар маош олади.