Ананасли пицца (Гавайи пиццаси) муаллифи ҳисобланган канадалик ошпаз ва ишбилармон Сем Панопулос Канаданинг Онтарио провинцияси Лондон шаҳридаги касалхонада вафот этди. Meduza’нинг хабар беришича, у 83 ёшда эди.
Сем Панопулос 1934 йили Грецияда туғилган. 20 ёшида Канадага кўчиб ўтган. 2015 йили берган интервьюсида, Канадага кетаётган кема Неаполда тўхтаган вақтида, пиццани севиб қолганини айтиб ўтган эди; ўша вақтларда Канадада пицца ҳали оммалашмаган эди.
Панопулос ака-укалари билан бирга ресторан бизнесида банд бўлган. У пиццага масаллиқ қўшиш бўйича турли тажрибалар ўтказган ва 1962 йили ананас, дудланган чўчқа гўшти ва бекон қўшилган пиццани ўйлаб топган, деб ҳисобланилади; таом маҳаллий хўрандаларнинг севимли егулигига айланиб, охир-оқибат бутун дунёга тарқалиб кетган.
2017 йили февралида Исландия президенти Гвюдни Ёуханнессон пиццага ананас қўшишга қарши чиқиб, агар имконияти бўлганида, бундай амалиётни тақиқлашинини айтган эди. Ўшанда Панопулос сиёсий арбобнинг эътирози тушунарсизлиги, ананас таомга янгилатувчи таъм беришини қайд этган эди.
Изоҳ (0)