Давлат ва хусусий сектор ҳамкорлиги тўғрисидаги қонун лойиҳаси муҳокама қилинмоқда

Норматив-ҳуқуқий актлар муҳокамаси порталида «Давлат ва хусусий сектор ҳамкорлиги тўғрисида»ги қонун лойиҳаси жойлаштирилди. Бу ҳақда «Газета.uz» хабар бермоқда.

Давлат ва хусусий сектор ҳамкорлиги бизнес ва давлат учун ўзаро манфаатли шартларда инвестицион лойиҳалар реализацияси схемасидир. Давлат ишлаб турган объектга эга бўлади, қурилиш ва реконструкцияни молиялаштириш банди бўйича маблағ тежайди, тадбиркорлар эса объектни кейинчалик эксплуатация қилиш учун маблағ ишлаб топади.

Ўзбекистон адлия вазирлиги томонидан таклиф этилган қонунга илова қилинган тушунтириш хатида айтилишича, бундай схеманинг Бразилия, Германия, Латвия, Жанубий Корея, Франция ва Японияда қўлланиши ижтимоий аҳамиятга молик масалаларни ҳал қилишда бюджет харажтларининг қисқаришига олиб келгани таъкидланмоқда.

Қонун лойиҳаси давлат ва хусуси сектор ҳамкорлиги реализацияси тартибини, бу бўйича келишувга қўйиладиган талабларни белгилаб беради, соҳада давлат кафолати ва давлат қўллаб-қувватлашини мустаҳкамлайди.

Давлат ва хусусий сектор ҳамкорлиги схемаси Ўзбекистон ижтимоий-сиёсий ва социал-иқтисодий ривожининг турли соҳаларида — илмий-техник, инновацион, телекоммуникацион, металлургия, тиббиёт, уй-жой ва коммунал, агросаноат ва бошқа, жами 16 соҳада жорий этилиши таклиф қилинмоқда.

Қонун лойиҳасига кўра, давлат ва хусусий сектор ҳамкорлиги бўйича келишувда келишув объекти ва предмети, томонларнинг ҳуқуқ ва мажбуриятлари, мол-мулк ва молиявий таъминот турлари ва шартлари, шу жумладан, объектнинг техник-иқтисодий кўрсаткичлари акс эттирилмоғи лозим. Келишувлар, шунингдек, томонларнинг хусусий ҳамкорга фаолият олиб бориш учун зарур мол-мулкни тақдим этиш бўйича томонлар мажбуриятларини, томонлар ўртасидаги ҳисоб-китоб тартибини, лойиҳани молиялаштириш тартиби ва шартларини белгилаб бериши керак.

Қонун лойиҳасининг қабул қилиниши тадбиркорларнинг ижтимоий аҳамиятга молик йўналишларда ташаббус кўрсатишига туртки бўлиши ҳамда давлат ва хусусий сектор ресурсларидан жамият ижтимоий эҳтиёжларини қондиришда самарали фойдаланиш методларининг жорий этилишига олиб келиши кутилмоқда.