Davlat va xususiy sektor hamkorligi to‘g‘risidagi qonun loyihasi muhokama qilinmoqda

Normativ-huquqiy aktlar muhokamasi portalida “Davlat va xususiy sektor hamkorligi to‘g‘risida”gi qonun loyihasi joylashtirildi. Bu haqda “Gazeta.uz” xabar bermoqda.

Davlat va xususiy sektor hamkorligi biznes va davlat uchun o‘zaro manfaatli shartlarda investitsion loyihalar realizatsiyasi sxemasidir. Davlat ishlab turgan obyektga ega bo‘ladi, qurilish va rekonstruksiyani moliyalashtirish bandi bo‘yicha mablag‘ tejaydi, tadbirkorlar esa obyektni keyinchalik ekspluatatsiya qilish uchun mablag‘ ishlab topadi.

O‘zbekiston adliya vazirligi tomonidan taklif etilgan qonunga ilova qilingan tushuntirish xatida aytilishicha, bunday sxemaning Braziliya, Germaniya, Latviya, Janubiy Koreya, Fransiya va Yaponiyada qo‘llanishi ijtimoiy ahamiyatga molik masalalarni hal qilishda budjet xarajtlarining qisqarishiga olib kelgani ta’kidlanmoqda.

Qonun loyihasi davlat va xususi sektor hamkorligi realizatsiyasi tartibini, bu bo‘yicha kelishuvga qo‘yiladigan talablarni belgilab beradi, sohada davlat kafolati va davlat qo‘llab-quvvatlashini mustahkamlaydi.

Davlat va xususiy sektor hamkorligi sxemasi O‘zbekiston ijtimoiy-siyosiy va sotsial-iqtisodiy rivojining turli sohalarida — ilmiy-texnik, innovatsion, telekommunikatsion, metallurgiya, tibbiyot, uy-joy va kommunal, agrosanoat va boshqa, jami 16 sohada joriy etilishi taklif qilinmoqda.

Qonun loyihasiga ko‘ra, davlat va xususiy sektor hamkorligi bo‘yicha kelishuvda kelishuv obyekti va predmeti, tomonlarning huquq va majburiyatlari, mol-mulk va moliyaviy ta’minot turlari va shartlari, shu jumladan, obyektning texnik-iqtisodiy ko‘rsatkichlari aks ettirilmog‘i lozim. Kelishuvlar, shuningdek, tomonlarning xususiy hamkorga faoliyat olib borish uchun zarur mol-mulkni taqdim etish bo‘yicha tomonlar majburiyatlarini, tomonlar o‘rtasidagi hisob-kitob tartibini, loyihani moliyalashtirish tartibi va shartlarini belgilab berishi kerak.

Qonun loyihasining qabul qilinishi tadbirkorlarning ijtimoiy ahamiyatga molik yo‘nalishlarda tashabbus ko‘rsatishiga turtki bo‘lishi hamda davlat va xususiy sektor resurslaridan jamiyat ijtimoiy ehtiyojlarini qondirishda samarali foydalanish metodlarining joriy etilishiga olib kelishi kutilmoqda.