31 май куни Москванинг Люблинский туман суди миллиардер Алишер Усмоновнинг Алексей Навальний ва Коррупцияга қарши кураш фондига қарши даъвоси бўйича қарор чиқарди. Усмонов «У сизга Димон эмас» текширувининг айрим парчалари унинг ишбилармон сифатидаги обрўсига путур етказишини айтганди. Ўз даъво талабида бизнесмен Навальний ва ККФга ушбу парчаларни ўчириш мажбуриятини юклашни сўради, аммо судья Марина Васина бутун фильмни ўчиришни буюрди, бу эса унчалик нормал ҳолат эмас, деб ёзади Meduza.
Фуқаролик-процессуал кодексига мувофиқ, агар Усмонов фильмнинг маълум бир қисмларини ўчиришни сўраган бўлса, судья бутун фильмни ва бутун матнни ўчиришни талаб қилиши мумкин эмасди. Бунга фақат қонун доирасидаги алоҳида ҳолатларда йўл қўйилиши мумкин, холос.
Судья роликни таҳрирлаш техник жиҳатдан мумкин эмаслигини назарда тутиб қарор матнини ўзгартирган бўлиши мумкин: бу ҳолда видеони қайта юклашга тўғри келади ва унинг url-манзили ўзгаради. Аммо видеони таҳрирлаш мумкин, дея таъкидланади хабарда.
Усмоновнинг юристлари ҳамон суд позицияси миллиардернинг даъво талабларига мувофиқ эмаслигини айтмоқда. Аммо улар «суд уларнинг ёнини олганидан хурсанд».
Навальнийнинг адвокати Иван Жданов эса суд томонидан даъво талабининг қатъийлаштирилиши «процессуал қонунчилик асосларининг бузилиши» эканлигини қайд этди. Навальний Люблинский суди қароридан норози бўлиб ариза бермоқчи. На у, на ККФ фильмни ўчириш ниятида эмас.
Изоҳ (0)