Ўзбекистон Президенти Шавкат Мирзиёев Андижон вилоятига ташрифи доирасида вилоят ҳокимлигида фаоллар билан йиғилиш ўтказди. Йиғилишда Президент ёшларни турли диний-экстремистик оқимлар таъсиридан асраш масаласига ҳам тўхталиб ўтди.
Алҳамдулиллоҳ, ҳаммамиз мусулмонмиз. Биз жуда кўп жойларда жаҳолатга қарши маърифат, ислом динини ўрганиш, ўргатиш ташаббуси билан чиқяпмиз. Ислом — бу фақат нурли ҳаёт. Исломни ниқоб қилиб, террорчи бўлиш, бошқа оқимларга кириш — бу андижонликларга ҳам, Ўзбекистонга ҳам ярашмайди.Давлат раҳбари имом-хатибларга қарата шундай деди: «Эртанги кунга тинчлик керак бўлса, ўша ашаддийсини Ўзбекистон фуқаролигидан чиқариш бўйича менга таклиф беради. Адашганларни эса илми билан, эътиқоди билан, ҳаётдаги намунаси билан бу кўчага ўтказади. Ё айтади: ‘Ўртоқ туман ҳокими, бунга жой бер, ер бер, уй бер, ҳовли бер. Бу ўзи асли ажабтовур одам экан, сен ноинсоф адолатсизлигинг учун, у ишсиз шундай бўлиб юрибди’».Ўтган сафар Шайхонтоҳурда бўлган мажлисда муфтий ҳазратларини, туманнинг 24 та маҳалла имом-хатибларини таклиф қилиб, айтдим ва буни ҳамма тўғри тушунсин. Шундай вақт келдики, ҳозир Ўзбекистонда диний оқимга ўтганни: «Э, бу менинг болам эмас», деяпмиз. «Бу қўшнининг боласи», деяпмиз. «Бу бошқа туманнинг боласи», деяпмиз. Лекин у Ўзбекистон фуқароси-ку!
Шайхонтоҳурдаги мажлисда мен жуда қаттиқ талаб қўйдим ва бугун Андижондаги дин пешволарига ҳам қаттиқ савол қўймоқчиман. Агар бешта маҳаллада, мисол учун, 20—30 нафар адашганлар бўлса, шу 20 нафардан бештаси ашаддий — у қайтмайди. Улар билан шуғулланиш керак эмас. Уларни Ўзбекистон фуқаролигидан чиқариш керак. Мен уларни Ўзбекистон фуқаролигидан чиқаришга тайёрман.
Энди оқни оқ, қорани қора деб айтадиган вақт келди. Кимгадир ёқмаса, кимдир бир вақтнинг ўзида икки стулда ўтираман деса — ундай муллолар бизга керак эмас. Давлат давлатчилигини қилади. Қонун устуворлигини таъминлашга, Худога шукр, қурбим ҳам етади, билимим ҳам етади, имкониятим ҳам етади.
Ҳар бир одамнинг юрагида эътиқоди бўлиши керак. Агар эътиқодига муносиб бўлиб, Ватанига хизмат қилса — у ватанпарвар бўлади. Агар у эътиқодсиз бўлиб, чаласавод бўлиб, хиёнат қилиб, иккита стулда ўтирса, «Бу давлат ўрнига бошқаси келса — ‘Акромийлар’ келса, уларнинг найрангига ўйнайман», деса — унақалар менга ўтмайди.
Шавкат Мирзиёев, Ўзбекистон Президенти
Айни вақтда, Шавкат Мирзиёев бу масалада жойлардаги ижро органлари ҳам хато қилаётганини қайд этиб ўтди. «Бу гапни Шайхонтоҳурда ҳам айтган эдим: битта адашганнинг бешта қариндоши бор, лекин биз ўша бешта қариндошини ҳам ашаддий душман қиламиз. Тўйга чақирмаймиз, маросимларга чақирмаймиз. Пичирлаб айтамиз: ‘У фалончининг акаси, фалончининг ўғли — чақирма уни!’. Эй, уларда нима айб? Уни ўзимизга дўст қилишимиз, чақиришимиз, маърифатга бошлашимиз керак — зора у таъсир қила олса нариёқда юрган қариндошига. Ана шуни кўндаланг қўядиган вақт келди», — деди Президент.
Изоҳ (0)