ФХХ ходимлари 25 май куни ИШИД террорчилик ташкилотининг тўрт нафар аъзосини қўлга олиб, Москва метрополитенидаги терактлар сериясининг олдини олди, деб хабар берди «Коммерсантъ».
Жангариларнинг кўрсатма беришича, уларнинг биринчи нишони «кофирлар истеъмол қиладиган чўчқа гўшти» ресторани бўлган, бироқ кейинроқ «Тёплий Стан» метро бекатида портлаш уюштириш, шунингдек, йўловчиларга нисбатан автомат ва гранаталарни қўллашни мақсад қилган.
«Террорчилар пойтахтда портлашни амалга ошириб, футбол бўйича Конфедерациялар кубоги ўтказилишига тўсқинлик кўрсатиши керак бўлган», — деб ёзади нашр. Ҳужумни жума кунларининг бирида, метро бекатида одам кўп бўлганида амалга оширмоқчи бўлишган. Жангарилар Туркиядан кўрсатма олган.
Нашр манбаларининг сўзларига кўра, қўлга олиш операцияси Москванинг Ново-Переделкино ҳудудидаги бир-биридан унчалик узоқ бўлмаган уйларда амалга оширилган. Ҳар бир ИШИД вакили алоҳида хонадонда ижарада турган. Уйлардан бирини портловчи қурилмалар ишлаб чиқарувчи цехга айлантиришган.
Шунингдек, у ердан автомобиль ўт ўчиргичи остида ниқобланган қўлбола бомба ҳам топилган. Унинг ичи аммиакли селитра, шакар қуми, мих ва гайкалар билан тўлдирилган. Бомба эшик радиоқўнғироғи орқали масофадан туриб ишга туширилиши керак бўлган. ФХХ экспертларининг маълумотларига кўра, Петербург метросида ҳам худди шу турдаги қурилма ишлатилган.
Бошқа хонадонлардан автомат ва гранаталар топилган.
Қўлга олинган шахслар Coca-Cola ишлаб чиқарувчи ташкилотда юк ташувчи бўлиб ишлаган: бир нафари Доғистон (Магомед Давудов), икки нафари Ўзбекистон (Фурқат Кушаев ва Муҳаммадюсуф Ашуров) фуқароси. Яна бир қўлга олинган шахс тожикистонлик (Абдушукур Гулмирзаев) бўлиб, террорчилик ишларида қатнашмаганини, ундан фақат «яширин» ишларда фойдаланишганини айтди. Қолганлар эса «ихтиёрий ва кўнгилли» равишда ИШИДга аъзо бўлганликларини тан олди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)