1 июнь куни АҚШ президенти Дональд Трамп у раҳбарлик қилаётган мамлакат иқлим ўзгариши бўйича Париж битимидан амалда чиққанини эълон қилиб, сайловолди ваъдаларидан бирини бажарди (шунчаки маълумот учун — Ўзбекистон мазкур битимга 2017 йилнинг 19 апрель куни қўшилган эди). Трампнинг маълум қилишича, глобал иқлим ўзгаришига қарши кураш талаблари миллионлаб иш ўринлари ва миллиардлаб долларларнинг йўқотилишига сабаб бўлади. Трампнинг бу қарори бошқа мамлакатлар томонидан танқид қилинди, дея хабар бермоқда Meduza.
1 июнь куни кундузи Трамп Оқ уй боғида чиқиш қилиб, Париж битими нима учун АҚШга тўғри келмаслигини тушунтирди. Президентнинг таъкидлашича, унинг учун америкаликлар ҳақида қайғуриш бошқа ҳамма нарсадан ҳам муҳимроқдир. Глобал ҳарорат кўтарилишини рад этмагани ҳолда, Трамп янги чекловлар 2025 йилга қадар АҚШда 2,7 миллион иш ўрнини қисқартириши, 2040 йилга бориб мамлакат иқтисодиёти уч триллион долларгача зарар кўриши ҳақидаги рақамларни келтирди. Америка етакчиси Париж битими доирасида 13 йиллик имтиёзли муддатга эга бўлган Хитойни ҳам эсдан чиқаргани йўқ. Қайд этиш жоиз, The New York Times газетаси Трамп келтирган рақамлар баъзи саволларга сабаб бўлаётгани ҳақида махсус мақола чиқариб улгурди.
АҚШ — атмосферани глобал иқлим ўзгаришининг катализатори ҳисобланган карбонат ангидрид гази билан «ифлослантириш бўйича чемпион». Ҳозирда заҳарли моддаларни атмосферага чиқариш бўйича Хитой етакчи бўлса-да, умумий ҳисоб-китоблар бўйича айнан АҚШ атмосферани иссиқхона гази билан «тўйинтириш»да энг кўп «иштирок этган». Баъзиларнинг фикрича, айнан шу сабабли ҳам Қўшма Штатлар иқлим ўзгаришига қарши курашда юқори даражада масъулият ҳис қилади: иқлим ўзгаришига қарши кураш жамғармасига Америка 3 миллиард доллар киритишга ваъда берган — бу барча давлатлар орасида энг катта кўрсаткич.
https://twitter.com/hfairfield/status/870283663690346496
Америка компаниялари, шаҳарлари ва ҳатто штатлари ҳам Трампнинг қарорига қарши чиқди. «Биз АҚШ битимда қолганида бажариши лозим бўлган барча ишларни қиламиз», — деди Нью-Йоркнинг собиқ мери, сиёсий арбоблар ва бизнесменлар уюшмасига бош бўлган Майкл Блумберг. Бу уюшмага Вашингтон, Нью-Йорк ва Вашингтон штати губернаторлари, шунингдек, 30 шаҳарнинг мерлари (улар орасида Лос-Анжелес, Атланта, Питсбург ва Солт-Лейк-Сити ҳам бор) қўшилди. SpaceX раҳбари Илон Маск эса, аввал ваъда берганидек, Трамп ўз қарорини эълон қилиши билан президент ҳузуридаги кенгашни тарк этди. Атмосферага зарарли моддаларни чиқаришни қисқартиришни Mars, Hewlett-Packard ва ўнлаб бошқа компаниялар, хусусан, автомобиль ишлаб чиқарувчилар ҳам қўллаб-қувватламоқчи — автозаводлар ўз маҳсулотлари сотиладиган бозорларни йўқотмаслик учун ҳам халқаро стандартларга риоя этиши шарт.
АҚШнинг асосий ҳамкорлари Трампнинг қарорини танқид остига олди. Франциянинг янги президенти Эммануэль Макрон Twitter’даги саҳифасида: «Сайёрани яна буюк қиламиз» деб ёзилган постерни чиқарди (бу — Трампнинг «Американи яна буюк қиламиз» деган шиорига киноя). У, Германия канцлери Ангела Меркель ва Италия бош вазири Паоло Жентилони билан бирга, Париж битими шартлари такрорий муҳокама қилиниши мумкин эмаслигини билдирди. Меркель эса АҚШнинг қарори «Ерни ҳимоя қилиш бўйича бизнинг журъатимизни тўхтатиб қола олмас»лигини қўшимча қилди.
Изоҳ (0)