Коалиция ИШИДга қарши операциялари давомида 484 нафар тинч аҳолининг ўлимига сабаб бўлганини тан олди
АҚШ бошчилигидаги коалиция ИШИД террорчиларига қарши операцияни бошлаган вақтдан бери Ироқ ва Сурияда «камида» 484 нафар тинч аҳоли ҳалок бўлди. Бу ҳақда коалициянинг 2 июнь, жума кунги баёнотида маълум қилинди, деб хабар берди «РИА Новости».
«Айни вақтда мавжуд маълумотларга кўра, операция бошланганидан бери коалиция зарбалари оқибатида камида 484 нафар тинч аҳоли ҳалок бўлди», — дея келтирилади баёнотда.
Баёнотда кўрсатилишича, «апрель ойида коалиция Ироқ ва Суриядаги ИШИД жангариларини йўқ қилиш операцияси доирасида берган зарбалари туфайли ҳалок бўлганлар ҳақида 43 та янги хабар олган».
«Коалиция шу вақтгача 47 та ҳисоботни ўрганиб чиқди. Улардан 31 таси ишончсиз, 16 таси эса ишончли дея топилди», — дея ҳужжатда қайд этилган. Бу «132 нафар тинч аҳолининг ўлимига сабаб бўлди» деб кўрсатилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
