Тўғри ва соғлом овқатланиш инсоннинг мукаммал ҳаёт кечириши учун зарур бўлган муҳим шартлардан бири ҳисобланади. Рамазон ойида рўза тутиш ҳам шулар жумласига киради. Рўза инсон организми фаолиятига ўз тузатишларини киритади.
Моддалар алмашиши шу тариқа овқатланишнинг ва уйқунинг янги режимига ўрганишга ва мослашишга ҳаракат қилади. Ёзги даврда тун жуда қисқа бўлгани туфайли, кўпчилик рўзадорлар саҳарликка турмасдан бир марта овқатланишни ёки саҳарлик қилгандан кейин дарров ётиб ухлашни афзал кўради. Ҳар икки ҳолат ҳам мақсадга мувофиқ эмас.
Саҳарликдан воз кечиш организмдаги моддалар алмашинувининг заифлашишига ва очлик ҳиссининг эртароқ пайдо бўлишига олиб келиши мумкин. Саҳарликда дастурхонингизда иложи борича оқсилга бой озиқ-овқатлар: тухум ва ачитилган сут маҳсулотлари бўлгани маъқул.
Шунингдек, бу даврда организм янада тезроқ сувсизланади, шунинг учун бир кунда ўртача 2—2,5 литр суюқлик ичиш лозим. Таомномангизга табиий шарбатлар, шўрва ва компотлар қўшиш ортиқчалик қилмайди.
Агар сиз рўзанинг охирида ортиқча вазнга эга бўлишни ва қон босимингизнинг ошишини хоҳламасангиз, у ҳолда бу даврда режим билан ва тўғри овқатланишга риоя қилишингиз зарур.
Дастурхонни, кейин эса меъдани катта миқдордаги, айниқса оғир таомлар билан тўлдириш ярамайди. Бу сизнинг нафақат ҳазм қилиш аъзоларингиз, балки юрак-томир тизимингиз фаолиятига ҳам салбий таъсир кўрсатади.
Ифторликни бир пиёла сув ёки бир-икки дона хурмо билан бошлаб, организмни ёғлар, тузлар ва бошқа зарарли моддалар билан тўлдирмасдан енгил салат ва шўрва билан давом эттиришингиз мумкин.
Дастурхондаги ҳамма овқатларни бир йўла емасликка ҳаракат қилинг, яхшиси овқатлар орасида 5—10 дақиқа танаффус қилинг. Бу овқат яхши ҳазм бўлишига ва тўйиб кетмасликка ёрдам беради. Овқатларни майдароқ тишлаб, узоқ ва яхшилаб чайнашга ҳаракат қилинг. Ифторликда иложи борича хамирли, ёғли, қовурилган овқатларни ва ширинликларни камроқ истеъмол қилинг.
Ширинлик сифатида пишириқлар ва музқаймоқ ўрнига, яхшиси меваларни танлаганингиз маъқул.
Шундай қилиб, хулоса ўрнида яна бир марта эслатамиз: Саҳарликда ёғсиз гўшт, сут маҳсулотлари, сабзавотлар ва мевалар истеъмол қилганингиз маъқул. Саҳарликни тонг отишидан олдин қилинг ва саҳарликдан кейин дарров ухлашга ётмасликка ҳаракат қилинг.
Манба: «Islam-today.ru»
Изоҳ (0)