Сўнгги уч кун ичида GM Uzbekistan билан боғлиқ иккита эътиборга молик хабар пайдо бўлди. Биринчиси — компаниянинг сўнгги бир неча йиллик ва қарийб ўзгармай келаётган фаолиятига кескин таъсир қилувчи хабар. Иккинчиси эса биринчи хабарнинг кутилган ҳосиласи. Лекин учинчи — ҳамма кутаётган хабар ҳозирча расман эълон қилинганича йўқ.
GM Uzbekistan 1 июндан ўзи ишлаб чиқарган барча автомобилларни Ўзбекистонда фақат сўмда сотади. Бу Ўзбекистон Президенти Шавкат Мирзиёев томонидан 26 май куни имзоланган қарорда белгилаб қўйилган. Хабар беришларича, шу вақтгача баъзи модификациялари сўмда, баъзилари эса халқаро пластик картаси орқали амалга ошириладиган тўлов (АҚШ доллари) эвазига сотилган автомобилларнинг барчасини фақат ва фақат сўмда сотиш таклифи Иқтисодиёт вазирлиги, Молия вазирлиги ва «Ўзавтосаноат» компаниясидан чиққан. Мазкур янгилик 2017 йил 1 июнгача имзоланган шартномаларга амал қилмайди.
Компания янги шартномалар тузиш ва автомобилларни беришни 31 майга қадар тўхтатди. GM Uzbekistan’нинг 29 май куни эълон қилинган ахборотида мазкур қарор «автомобиллар қолдиқларини инвентаризация қилиниши муносабати билан» қабул қилингани айтилган. «Инвентаризация якунлангандан сўнг, тўланган шартномалар бўйича автомобилларни тузилган шартномаларда кўрсатилган нархларда етказиб бериш амалга оширилади», — дейилади компания ахборотида. Компания «тўланган шартномалар» тушунчасига ҳам аниқлик киритиб кетган: «Харидор томонидан шартномада кўрсатилган автомобиль нархининг белгиланган минимал қиймати (85 фоиз) ёки тўлиқ қиймати тўланган ҳолатда автомобиль нархи тўланган ҳисобланади».
GM Uzbekistan’нинг атиги учта гапдан иборат мазкур хабари нарх ошиши ҳақидаги миш-мишлар фонида камида 85 фоизлик тўловни олдиндан амалга оширган харидорларни хотиржам қилиши аниқ: Chevrolet’ларнинг нархи сўнгги марта 2015 йил декабрида қарийб 30 фоизга ошган бўлиб, ўшанда компания билан амалдаги шартномаси бўлган, белгиланган тўловнинг 85 фоизини олдиндан амалга оширган харидорлар янги нархларда қўшимча тўлов қилишга мажбур бўлган ва бу ҳол кўпчиликнинг ҳақли норозилигига сабаб бўлганди.
GM Uzbekistan нархлар ошиши ҳақидаги миш-мишларни на рад этмоқда, на тасдиқламоқда. Компания матбуот хизмати нархларнинг ошиши ҳақида ҳозирча ҳеч қандай маълумот йўқлигини маълум қилди. «Дарё»нинг GM Uzbekistan бўлимларидан биридаги манбасига кўра, «катта эҳтимол билан, нархлар ошиши мумкин». Унинг таъкидлашича, 2015 йилги нарх ошиши арафасида ҳам автосалонлар инвентаризация учун ёпилган эди. Бундан ташқари, барча моделлар ва модификацияларнинг нархи бир хилда ўсмаса-да, баъзи, аниқроқ айтганда, шу вақтгача халқаро пластик картадаги хорижий валюта эвазига сотилган модификацияларнинг қиймати юқорига қараб ўзгариши эҳтимоли ҳақиқатга яқин.
Таққослаш учун, шу вақтгача қиймати сўмда кўрсатилиб, расман халқаро пластик картадаги АҚШ долларига сотилган энг арзон янги Malibu’нинг нархи қарийб 50 миллион сўм бўлгани ҳолда, Malibu’нинг фақат сўмга сотиладиган ягона модификацияси нархи салкам 125 миллион сўм эди. Умуман олганда, GM Uzbekistan’нинг сўмда ва долларда сотиладиган модификацияларининг сўмдаги ҳозирги нархлари бир-биридан қарийб икки баробар фарқ қилади. Автосаноатдаги манбанинг сўзларига кўра, 2015 йил 14 декабрида бўлгани сингари, инвентаризация учун ёпилган автосалонлар «1 июнь куни янги нархлар билан очилиши эҳтимоли анча катта».
Изоҳ (0)