Япония автоконцернлари ҳайдовчисиз бошқарув технологиялари яратишга 25,5 млрд доллар сарфлайди

Япониянинг етакчи автоконцернлари 2018 йил 31 март куни якунланадиган жорий молиявий йилда ҳайдовчисиз бошқарув технологиялари ва экологик тоза машиналарнинг янги авлодини яратишга 2,85 триллион иена (25,5 миллиард доллар) сарфлайди. Бу охирги пайтдаги энг юқори кўрсаткич ҳисобланади, деб хабар беради «ТАСС».

Хусусан, Toyota бу мақсадларга 1,5 триллион иена (13,4 миллиард доллар) ажратади. Honda 750 миллиард иена (6,7 миллиард доллар) — ўтган йилга нисбатан 9,4 фоизга кўпроқ сарфлайди.

Технологияларни ривожлантиришга харажатларнинг энг юқори кўрсаткичи Subaru томонидан режалаштирилган. Компания ўз бюджетидан 134 миллиард иена (1,2 миллиард доллар) ажратади, бу аввалги йилга нисбатан 17,3 фоизга кўп.

Қатор концернлар сенсор ва камералар, коммуникациялар ва глобал позициялаш тизимлари яратиш билан шуғулланувчи компаниялар билан ҳамкорликни режалаштирмоқда. Жумладан, Honda ўзига шерик сифатида Google компаниясини танлади.