Чеченистон раҳбари Рамзан Қодиров республикадаги мактаблар биноларида битирув кечаларини ўтказишни тақиқлашни ёқлаб чиқди, бунга ота-оналарнинг тантаналарни ташкил қилишга мажбурий пул йиғимлари юзасидан шикоятлари сабаб бўлди, деб ёзади «Газета.ru». Бу ҳақда у республика таълим ва фан вазири Исмоил Бойхонов билан учрашувда айтиб ўтди.
«Ўтган йилларда менга ота-оналар битирув кечаси учун турли пул йиғимлари ҳақида шикоятлар билан кўп мурожаат қилган эди. Битирув кечалари доим бўлган ва бўлиб қолади. Фақат битта ўзгариш билан — улар мактаб биноларидан ташқарида ўтказилади», — деди республика раҳбари.
Қодировнинг сўзларига кўра, энди буни ихтиёрий асосда ота-оналар қўмитаси ёки битирувчилар ҳал қилади. Унинг аниқлик киритишича, фарзандлари тантаналарда қатнашишни истаган ота-оналар битирув кечаларини маҳаллий кафе ёки ресторанларда ташкиллаштириши мумкин.
Изоҳ (0)