Қовурилган қиймали сомса (пирожка)лар мазали, тўйимли ва жуда оддий таом ҳисобланади. Қийма сифатида қайнатилган гўшт ва картошка ёки тухум ишлатишингиз мумкин.
Бугун биз сизнинг эътиборингизга картошкали пирожка тайёрлаш усулини ҳавола қилмоқчимиз.
Зарур масаллиқлар:
Хамир учун- Сув — 2 стакан
- Қуруқ хамиртуруш — 2 ош қ.
- Шакар — 2 ч.қ.
- Туз — 1 ч.қ.
- Ўсимлик ёғи — 4 ош қ.
- Ун — 8 стакан
- Картошка — 8 дона
- Пиёз — 1 дона
- Туз — 0,3 ч.қ.
- Эзилган мурч — 0,5 ч.қ.
Тайёрланиши:
Биринчи бўлиб хамирни тайёрлаймиз. Сувни илиқ ҳолга келгунча қиздирамиз ва чуқур идишга қуямиз. Сувга шакар, туз, ўсимлик ёғи ва хамиртурушни қўшамиз. 5 дақиқа кутамиз.Хамирга унни қисмларга бўлиб элаб соламиз.
Хамир сал зичлашгандан кейин стол устига оламиз ва унни аралаштиришда давом этамиз. Қайишқоқ, ёпишмайдиган хамир қорамиз.
Хамиртурушли хамир 10 дақиқага яқин аралаштирилади. Чунки хамирни қанча кўп аралаштирсангиз, пирожкалар шунча юмшоқроқ ва мазалироқ бўлади.
Хамирни идишга соламиз ва илиқ жойда 1 соатча тиндириб қўямиз.
Хамир тайёр бўлгунча қиймасини тайёрлаймиз.
Картошкани қайнатамиз, пиёзни қовурамиз. Картошка ва пиёзни бирга қўшиб эзамиз.
Тайёр бўлган картошка қиймага туз ва зираворлар қўшамиз. Уни хона ҳароратигача совутамиз.
Тайёр бўлган хамирни бўлакларга ажратамиз. Биз тайёрлаган хамирдан 20 га яқин пирожкалар букиш мумкин.
Ҳар бир бўлак хамирни ўқлов ёрдамида ёйиб чиқамиз. Ўртасига қийма қўямиз.
Чеккаларини букиб пирожка шаклига келтирамиз.
Пирожкаларни 15 дақиқа дам олдириб қўямиз.
Товани қиздирамиз, ўсимлик ёғини соламиз ва юзаси жигарранг тусга киргунча қовуриб оламиз.
Пирожкаларни ўртача оловда ва қопқоғи ёпиқ ҳолда пиширамиз. Шундай ҳолатда улар яхши қовурилади.
Ёқимли иштаҳа!
Изоҳ (0)