Тошкент вилояти божхона бошқармаси ходимлари турли товар-моддий бойликларнинг божхона назоратидан яширинча олиб кирилишига доир бир нечта қонунбузарлик ҳолатларини фош қилди. Бу ҳақда Тошкент вилояти Божхона бошқармаси матбуот хизмати «Дарё» маълум қилди.
Жумладан, «Ғишткўприк» чегара-божхона комплексида республикага кириб келган енгил автомашиналардан бири божхона кўригидан ўтказилганда, унинг эшиклари орасидаги кўз илғамас бўшлиқларга тўрт турдаги 1100 донадан ортиқ стоматологик техник восита яширилганлиги аниқланди.
Божхона ходимининг оғзаки сўров вақтида ҳамда йўловчи божхона декларациясида маълум қилинмаган ва қиймати салкам 110 миллион сўмни ташкил қилувчи ушбу тиббий воситалар фуқаро М.Бакиевга тегишли бўлиб чиқди.
«Яллама» чегара-божхона постида эса фуқаро Т.Тўйчиев «Камаз» русумли автоулови юкхонасининг пол қисмига 33 турдаги 2 141 дона, шунингдек уч турдаги салкам 60 килограмм биологик актив қўшимчаларни яширган ҳолда республикага олиб киришга уринди. Божхона расмийлаштируви ва сифатини тасдиқловчи ҳужжатлари бўлмаган мазкур товар-моддий бойликларнинг умумий қиймати 182 миллион сўмдан ошди.
Шунингдек, мазкур постда божхоначилар йирик миқдордаги яна бир божхона қоидабузарлигини фош қилди. Тегишли ҳужжатларга кўра, MAN русумли юк автомашинасида пойтахтдаги Inter auto line масъулияти чекланган жамияти номига ун маҳсулотлари келтирилаётган бўлиши керак эди. Бироқ, божхона кўриги давомида божхоначилар Х.Холматов бошқарувидаги мазкур автомашина юкхонасида ун маҳсулоти ўрнида ноутбуклар, турли истеъмол товарлари, биологик актив қўшимча ва гиёҳлар, алкоголли ичимликлар, кийим-кечаклар, газламалар ва бошқа товар-моддий бойликлар борлиги аниқланди.
Йўл-юк кузатув ҳужжатларида қайд этилмаган ва божхона назоратидан четлаб олиб кириш пайтида тўхтатиб қолинган мазкур товар-моддий бойликларнинг умумий қиймати 923 миллион сўмдан ортиқни ташкил этди. Мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Изоҳ (0)