Америкалик яхтачи Жеймс Кэмеронни «Титаник» фильмида ўз аждодлари тарихидан фойдаланганликда айбламоқда

Флоридада истиқомат қилувчи яхтачи (яхталарни бошқариш бўйича мутахассис) Стивен Каммингс режиссёр Жеймс Кэмеронни судга берди. Америкаликнинг сўзларига кўра, Кэмерон унинг аждодлари тарихидан фойдаланиб «Титаник» фильмида бош қаҳрамон образини яратган, деб хабар берди TMZ.

Каммингснинг таъкидлашича, у ўзининг қариндошлари ҳақида дўсларига сўзлаб бергани сабаб Камерон бундан хабар топган. Унинг айтишича, яхтачининг аждодлари ҳисобланмиш эр-хотин «Титаник»да саёҳатга чиққан. Кема ҳалокатга учраши оқибатида эркак ҳалок бўлган, аёл эса тирик қолган.

Америкалик яхтачи режиссёрдан 300 миллион доллар ва 1997 йилда фильмлар учун тўланган муаллифлик маблағларининг бир фоизини талаб қилмоқда.

«Титаник» фильми 11 та «Оскар», тўртта «Олтин глобус» ва бешта Grammy мукофотини қўлга киритган. Жаҳон прокатида 2,18 миллиард доллар маблағ йиққан.

1912 йил 15 апрелда «Титаник» айсбергга урилиб ҳалокатга учраши оқибатида 1496 нафар одам ҳалок бўлган, 712 кишини қутқариб қолинган эди.