Тошкентнинг «Обод» футбол клуби Олий лиганинг иккинчи даврасида иштирок этмаслиги мумкин, деб ёзди «Championat.asia» нашри. Хабарда клубнинг мамлакат элитасидаги илк хусусий клуб экани қистириб ўтилган.
Бу борадаги гап чамаси бир ойлар илгари чиққанди. Аниқроғи, «Обод» Олий лиганинг 8-турида «Локомотив»дан 0:7 ҳисобида енгилгач, раҳбарият футболчиларга танг аҳвол ҳақида маълумот берган.
2016 йилги мавсумни дебютант сифатида бошлаган «Обод» ПФЛга бадал пулини биринчи бўлиб ўтказиб берган, 2017 йилнинг 11 та тури ортда қолганида эса жамоанинг ПФЛ олдида қарздорлиги мавжуд. «Обод» ҳомийлари мавжуд вазиятдан келиб чиқиб, иккинчи даврада жамоани молиялаштиришдан тўхташи катта эҳтимол.
«Обод» футбол клубининг 2016 йилги харажатлари 2—3 миллиард сўм атрофида бўлган. Футболчилар ҳар бир ғалаба учун 1 миллион сўм миқдорида мукофот пули олиб келган.
Маълумот учун, 16 та жамоа чемпионлик учун кураш олиб борадиган чемпионатда «Обод» 2 та ғалаба, 3 та дуранг ва 6 та мағлубият билан 15-ўринни эгаллаб турибди. Жамоа 2016 йилги мавсум Олий лигадаги дебют мавсумини ўтказганди.
Изоҳ (0)