Наманган шаҳрида профилактика ва ҳуқуқбузарликларнинг олдини олиш куни «Юрт тинчлиги учун барчамиз масъулмиз» шиори остида марафон ташкил этилди. Бу ҳақда «Дарё»га Наманган вилоят ИИБ матбуот хизмати маълум қилди.
Наманган вилоятидаги олий таълим муассасалари талаба ёшлари иштирок этган марафонда қатнашчилар Наманган шаҳридаги темир йўл вокзали чорраҳасидан ўлкашунослик музейигача бўлган масофани босиб ўтди. Икки босқичда қизлар ва йигитлар ўртасида алоҳида бўлиб ўтган марафон соғлом турмуш тарзини тарғиб қилишга қаратилди.
Ғолиблар ва марафон давомида фаол иштирок этган ёшлар Наманган вилоят ИИБ диплом ва эсдалик совғалари билан тақдирланди.
Профилактика кунининг узвий давоми сифатида ички ишлар органлари ходимлари, ўзини ўзи бошқариш органи вакиллари билан биргаликда «Янги тонг» МФЙда кун давомида бажарилиши керак бўлган вазифалар тақсимоти юзасидан йиғилди.
Ҳар бир бўлинма ва ташкилотга хизмат вазифасидан келиб чиққан ҳолда топшириқлар тақсимлангандан сўнг белгиланган гуруҳлар ҳудуддаги кўп қаватли уйларда истиқомат қилувчи хонадон вакиллари билан учрашиб, уларнинг турмуш шароити, паспорт тизими ва бошқа масалалар бўйича суҳбатлар ўтказилди.
Таълим муассасаларига бириктирилган гуруҳлар эса Наманган шаҳридаги барча олий ва ўрта таълим муассасаларида давомат тадбирлари ўтказиб, ўқувчиларнинг таълим жараёни билан яқиндан танишди.
Кун давомида амалга оширилган ишлар юзасидан Наманган юридик коллежида муҳокама йиғилиши ташкил этилди. Наманган шаҳар ҳокими, вилоят прокурори ўринбосари, шаҳар прокурори, ички ишлар бошқармаси бошлиғи ҳамда жиноят ишлари бўйича Наманган шаҳар судининг судьяси иштирок этган йиғилишда ҳафта давомида шаҳарда содир этилган жиноятлар бўйича ҳисоботлар тингланди. Шундан сўнг ҳуқуқбузарликларни содир этган шахслар кенг жамоатчилик олдида муҳокама этилиб, уларга қонуний чоралар кўрилди.
Изоҳ (0)