17 май, чоршанба куни Америка президенти Дональд Трамп маъмурияти атрофидаги можаролар туфайли АҚШ ва бошқа қатор мамлакатлар фонд бозорларида юз берган қулашлар оқибатида дунёнинг 500 нафар энг бой одамларининг жами давлати қарийб 35 миллиард долларга камайиб кетди, деб ёзади «ТАСС».
Сайёрадаги энг бадавлат одам — Билл Гейтс ўз компанияси Microsoft акциялари 2 фоиздан ортиққа арзонлашгани туфайли, тахминан 1 миллиард доллардан ажралди. Bloomberg’нинг сўнгги ҳисоб-китобларига қараганда, Гейтснинг ҳисобида 86,6 миллиард доллар қолди.
Америкалик тадбиркор, Amazon компанияси раҳбари Жеффри Безос 1,7 миллиард долларга камбағаллашди: Amazon қимматбаҳо қоғозлари 2,2 фоизга арзонлашди.
Zara савдо белгиси асосчиси Амансио Ортега 355 миллион доллар йўқотди — унинг бойлиги 83,2 миллиардга тушиб қолди. Шунга қарамай, Ортега Безосни ортда қолдириб, сайёранинг энг бой одамлари рўйхатида иккинчи ўринга чиқиб олди.
Facebook асосчиларидан бири Марк Цукерберг 2 миллиард долларидан ажралди. Компания акциялари нархи 3,3 фоизга пасайди, Цукербергнинг давлати эса 62,3 миллиард долларгача камайди.
Bloomberg таъкидлашича, фонд бозорларидаги кескин пасайишларга Вашингтондаги сиёсий можаролар Америка иқтисодиётига салбий таъсир кўрсатиши мумкинлиги борасидаги хавфсирашлар сабабчи бўлган.
Эслатиб ўтамиз, аввалроқ АҚШ президенти Дональд Трамп Россия ташқи ишлар вазири Сергей Лавров билан учрашув чоғида махфий маълумотни ошкор қилгани хабар берилган эди. ABC News каналининг аноним манбаларига кўра, гап ИШИД жангариларининг АҚШга йўл олаётган самолётни портлатиш режалари ҳақида борган.
Изоҳ (0)