Ford компанияси 20 мингга яқин одамни ишдан бўшатишни режалаштирмоқда. Reuters’нинг маълум қилишича, концерн бу билан харажатларини йилига уч миллиард долларга камайтиришни мўлжаллаган, деб хабар берди «Мотор».
Штатларни қисқартириш асосан Шимолий Америка ва Осиё ҳудудларига тегишли, жараён ихтиёрий бўлиб, аксарият ходимларга нафақага чиқиш учун фойдали таклиф билдирилади. Шу билан бирга бошқа ишчиларнинг маоши ва ишлаб чиқариш ҳажми олдинги даражасида қолади.
Мутахассислар фикрича, бундай қарорга келишга сабаб АҚШда компаниянинг янги автомобилларига бўлган талабнинг камлиги, шунингдек, эски машиналарининг нархлари пастлиги ва янги технологиялар ишлаб чиқаришдаги катта сарф-харажатлар.
Айни вақтда компания омборларида турли ҳисоб-китобларига кўра, тўрт миллионга яқин янги Ford машиналари йиғилиб қолган. Яна бир омил сифатида амалдаги бош директор Марк Филдснинг ваколати узайтирилгани сабаб компания акциялари қийматининг пасайиши кўрилмоқда.
Ишчиларни қисқартириш жараёнини 2017 йилнинг кузида якунлаш режалаштирилмоқда. Ҳозирда Ford компаниясида 200 минг одам ишлайди.
Изоҳ (0)