Андижонлик Раҳматилло ота Ўзбекистон бўйлаб пиёда саёҳат қилмоқда

Андижон вилояти Андижон туманидаги Гулобод шаҳарчасида истиқомат қилувчи 65 ёшли Раҳматилло Қосимов Ўзбекистон бўйлаб пиёда саёҳат қилмоқда, деб ёзади «Zarnews.uz».

Бир неча йиллар давомида Андижон вилоят мусиқа ва драма театрида, туман маданият уйларида қўшиқчи-ҳофиз бўлиб ишлаган отахон айни вақтда нафақада. Шунга қарамай, Раҳматилло ота Ўзбекистонда амалга оширилаётган ўзгаришлар, шаҳар ва қишлоқларда қад ростлаётган замонавий бино ва иншоотлар, кенг, равон кўча ва йўлларни ўз кўзи билан кўришни, шунингдек, Самарқандга келиб, Ўзбекистоннинг Биринчи Президенти Ислом Каримов қабрини зиёрат қилишни ният қилиб, мамлакат бўйлаб пиёда айланиб чиқишга қарор қилди.

Саёҳатни машинада икки-уч кун ичида амалга оширсам ҳам бўларди. Аммо шунча йўлни пиёда юриб ўтишга аҳд қилдим. Қолаверса, соғлиқ учун пиёда юриш фойдали, асаблар мустаҳкам бўлиб, танада қон айланиши яхшиланади. Секин-секин юриб, юртимнинг барча гўзалликларини ўз кўзим билан кўрмоқчи бўлдим.

Раҳматилло Қосимов

Саёҳатга икки ой тайёргарлик кўрилди ва 9 апрель – соҳибқирон Амир Темур туғилган кун йўлга чиқди. Раҳматилло Қосимов Андижондан чиқибоқ Фарғона, Наманган вилоятларига қарашли шаҳар ва қишлоқларни айланди. Отахон ўз йўлида Тошкент вилоятининг Бекобод шаҳри орқали Сирдарёни кечиб, Сирдарё вилоятига ўтди. Гулистон, Янгиер шаҳарларини томоша қилди. Жиззах шаҳрида бўлди. Сангзор дарёси бўйида Бахмалнинг қип-қизил олмаларидан, Ғаллаоролнинг асалларидан тотиб кўрди.

9 май – «Хотира ва қадрлаш» куни арафасида саёҳатчи Самарқанд шаҳрига кириб келди. Бу ерда Ўзбекистоннинг Биринчи Президенти Ислом Каримов қабрини зиёрат қилиш билан бирга, бошқа тарихий обидалар ҳамда шаҳарнинг диққатга сазовор жойларини томоша қилди.

Борган сари ғайратим ошиб бормоқда, қанча юрсам, шунча ёшаргандай бўлаяпман. Маҳдуми Аъзам, Имом Бухорий қадамжоларини зиёрат қилиб, Навоий вилояти томонга йўл оламан. Ундан сўнг Бухоро, Хоразм вилоятларига, шунингдек, Қорақалпоғистон Республикасининг Орол денгизи ёқасидаги Мўйноқ шаҳригача боришни режалаштирганман.

Раҳматилло Қосимов

Кекса саёҳатчи Қашқадарё вилоятининг Қарши, Шаҳрисабз, Сурхондарёнинг Термиз шаҳарларига йўл олади. Ниҳоят, саёҳат якунида Тошкентнинг диққатга сазовор жойларини томоша қилиш ниятида.