Олий Мажлис депутати: Ҳудудларда тор доирадаги малакали шифокорлар етишмовчилиги мавжуд

Жорий йилнинг 16 май куни Олий Мажлис Қонунчилик палатасининг навбатдаги мажлиси бўлиб ўтди. Депутатлар Республика ихтисослаштирилган терапия ва тиббий реабилитация илмий-амалий тиббиёт маркази ҳамда Республика нейрохирургия илмий маркази раҳбарларининг ахборотини эшитдилар, деб хабар берди ЎзА.

Мажлисда қайд этилишича, Республика ихтисослаштирилган терапия ва тиббий реабилитация илмий-амалий тиббиёт маркази томонидан ҳар йили 8 минг нафардан зиёд беморга стационар ёрдам кўрсатилмоқда. Ўзбекистон Президенти белгилаб берган вазифалардан келиб чиқиб, ушбу марказ мутахассислари томонидан жорий йилда 29 маротаба жойларга чиқишлар ташкил этилди, улар доирасида 5,1 минг нафардан зиёд киши тиббий кўрикдан ўтказилди, шунингдек, марказ мутахассислари томонидан ушбу соҳадаги 1068 нафар мутахассис тегишли малака ошириш курсларидан ўтди.

Республика нейрохирургия илмий маркази томонидан 2016 йилда 5 минг нафардан ортиқ беморга стационар ёрдам кўрсатилди ва 3,5 минг нафар беморда жарроҳлик амалиёти ўтказилди. Шу билан бирга, жорий йилда марказ мутахассислари томонидан республика минтақаларида 6 та маҳорат дарси, 201 та жарроҳлик амалиёти, 19 та семинар машғулоти ташкил этилди, шунингдек, соғлиқни сақлаш тизимининг бошланғич бўғинлари учун нейрохирургик касалликлар бўйича услубий қўлланмалар тарқатилди. 2016 йилда 54 нафар мутахассис, шундан 7 нафари хорижда малака ошириш курсларидан ўтди. Жорий йилда 39 нафар мутахассис малака оширди.

Муҳокама давомида мавжуд муаммоларни аниқлаш ва уларни бартараф этиш бўйича аниқ чора-тадбирлар ишлаб чиқишга асосий эътибор қаратилди. Хусусан, марказлар ҳамда бирламчи тиббиётнинг барча бўғинларида ихтисослаштирилган тиббий ёрдам кўрсатишнинг кенг қамровли тизими тўлиқ ташкил этилмаганлиги таъкидланди. Шунингдек, жойларда ва марказларнинг филиалларида малакали кадрларга бўлган талаб долзарблигича қолмоқда. Ходимлар малакасини доимий равишда ошириб бориш мақсадида республика ҳудудларида маҳорат дарсларини мунтазам ўтказиш ва кўпайтириш, телемедицина тармоғи имкониятларидан кенг фойдаланиш зарурати мавжуд. Шунингдек, ихтисослаштирилган марказлар мутахассисларини хориждаги етакчи клиникаларда янги технологиялар билан ишлашга ўқитиш ва хориждаги марказлардан жалб этилган мутахассислар учун шарт-шароитлар яратиш юзасидан тегишли чоралар кўриш зарурлиги таъкидланди.

Ўрганишлар натижасида аниқландики, мазкур марказлар томонидан аҳолига малакали ихтисослаштирилган тиббий ёрдам замон талаблари даражасида кўрсатилмоқда. Лекин, ҳудудларда ички касалликлар ва нейрохирургия соҳасидаги касалликларни профилактика қилиш, уларга ташхис қўйиш ҳамда даволашда тор доирадаги малакали мутахассисларнинг етишмовчилиги кузатилмоқда.

Олий Мажлис Қонунчилик палатаси депутати Мавлуда Хўжаева