Renault’нинг Франция ва Словениядаги бир қанча заводлари киберҳужумдан сўнг вақтинчалик тўхтатилди. Бу ҳақда, AP’га асосланиб, «Коммерсант.ru» хабар бермоқда.
Франциянинг Сандувиль коммунаси ҳамда Нормандия ўлкасидаги заводлар иши тўхтади.
Словения радиостанциясининг хабар беришича, Renault’нинг мамлакатдаги бўлинмаси — Revoz мамлакат жануби-шарқидаги Ново-Место шаҳарчасида жойлашган заводининг ишини тўхтатди. Бу вирус тарқалишининг олдини олиш учун амалга оширилди.
Бундан ташқари, Renault’нинг Руминиядаги шуъба корхонаси — Dacia автомобилсоз компанияси Миовень шаҳрида IT-тизимдаги нуқсонлар боис фаолиятини тўхтатди.
12 май куни 70 дан ортиқ мамлакат, шу жумладан, АҚШ, Буюк Британия, Хитой, Россия, Италия кенг миқёсли киберҳужумга учради. Компьютерга тушган вирус барча файлларни блоклаб қўйиб, экранга товон пули талаб қилинган хабарни чиқаради. ОАВга кўра, киберҳужум ташкилотчилари АҚШ миллий хавфсизлик агентлигига тегишли дастурий таъминотдан фойдаланган. Кейинчалик вируснинг тарқалиши домен номининг рўйхатга олиниши билан тўхтатилди.