Microsoft янгиланган интерфейсли Windows 10 ва янги Story Remix видеоредакторини тақдим этди

11 май куни Build конференциясида Microsoft компанияси видеони таҳрирлаш учун «ақлли» воситани ва Windows’нинг янгиланган дизайнини тақдим этди, шунингдек, тизимнинг кузги янгиланмаси ҳақида эълон қилди, деб ёзади TJournal.

Story Remix, масалан, қандайдир тадбирдан олинган кичик видеолар асосида «ҳикоялар» яратиш имконини беради. Дастур видеодаги одамларни автоматик тарзда таниб олиши мумкин, унинг график ва аудиоэффектларнинг тайёр шаблонларидан иборат ўз кутубхонаси бор.

Шунингдек, Story Remix фойдаланувчилари ўз видеоларига 3D-объектларни қўйиб, уларни роликлар ичидаги объектларга «бириктириши» мумкин. Дастур оддий технологияларни қўллайди, лойиҳани мобил телефонда бошлаб, компьютерда якунлаш мумкин.

Бундан ташқари, Microsoft ўз операцион тизимининг редизайнини эълон қилди. Янгиланган концепцияни Fluent Design System деб аташди. Стандарт дастурлар аста-секинлик билан янги дизайнга ўтади.

Шунингдек, тизимда Timeline ва PickUp функциялари пайдо бўлади, улар турли қурилмалардаги битта дастурда узлуксиз ишлаб, тезгина унисидан бунисига ўтиш имконини беради.

Компания OneDrive файл айирбошловчининг On-Demand деган янги функцияси ҳақида эълон қилди. У «булут»дан бутун пaпкани юклаб олиш ўрнига, муайян файлларни дарҳол олиш имконини беради.