Тошкент шаҳар ИИББга 3 май куни фуқаро А. ариза билан мурожаат қилди. Фуқаронинг аризасига кўра, апрель ойида Б. исмли шахс қўнғироқ қилиб, тўрт ёшли ўғил бола борлигини ва уни 2 минг АҚШ доллари эвазига сотиб олишни таклиф қилаётганини айтган. Фуқаро ўз аризасида ушбу шахсга қонуний чора кўришни сўраган. Бу ҳақда Тошкент шаҳар ИИББда 11 майда бўлиб ўтган брифингда маълум қилинди.
Аризага асосан 3 май куни Яккасарой туманида ўтказилган тезкор тадбир натижасида боланинг онаси Д. исмли шахс билан биргаликда 1000 АҚШ доллари эвазига тўрт ёшли болани сотаётган вақтда ички ишлар идоралари ходимлари томонидан қўлга олинган.
Ҳолат юзасидан Жиноят Кодексининг 135-моддаси 3-қисми «а» банди (одам савдоси аломатлари) билан жиноят иши қўзғатилиб, қўлга олинган шахсларга нисбатан қамоққа олиш эҳтиёт чораси қўлланган.
Боланинг онаси берган кўрсатмага кўра, у фарзанди билан Қашқадарёдан келган ва бир танишининг уйига жойлашган. Орадан бир ҳафта ўтгач, у боласини сотишда иштирок этган Азиза исмли аёл билан танишган. Аёл қисқа вақт ичида боланинг онаси билан жанжал қилган ва боласи билан Қашқадарёга қайтиб кетиши кераклигини айтган.
Шундан сўнг Азиза бир танишига қўнғироқ қилиб, боланинг онаси қийналиб қолганини ва унга ёрдам бериш кераклигини айтган. Кейин эса Азиза ўзи қўнғироқ қилган аёл ва Илҳом исмли эркак билан гаплашган ва боланинг онасини четга чиқариб қўйган. Шундан сўнг Азиза боланинг онасига болани уларга беришни айтган.
Азиза боланинг онасига ҳужжатларни тайёрлаётганда саволларга «хўп» деб жавоб бериши кераклигини айтган ва болани олиб кетган.
Болани сотишда бевосита иштирок этган Азиза исмли аёлнинг кўрсатмасига кўра, у болани сотиш ҳақида гап чиққанидан сўнг Илҳом исмли танишига қўнғироқ қилган. Аёл таниши билан Жанубий вокзал яқинида учрашган.
У ерда боланинг онаси ва бола ҳам бўлган. Илҳомнинг таниши улар турган жойга келган. Азиза болани олиш учун келган аёлдан қанча пул бермоқчилигини, икки минг доллар бера оладими ёки йўқлигини сўраган. Азиза болани олмоқчи бўлган аёлдан бир минг доллар олган.
Изоҳ (0)